Real Betis-in Rayo an ngam

Manuel Pellegrini enkawlna hnuaiah Real Betis-in season duhawm an hman chhunzawm zel a, Copa del Rey semifinal first leg-ah 2-1 in Rayo Vallecano chu an hneh - an ke lehlamin final an rap ta.

Vallecas Stadium-a inkhelah mualneitu Rayo tan Alvaro Garcia chuan minute ngana lekah goal hmahruai a khung a, mikhual team an hawihai.

Mahse, Betis an hnufual rei lo - forward Borja Iglesia chuan penalty area pawn aṭangin minute 26-naah si phurh sutna goal a rawn khung a, Betis an phur sawt.

Minute 68-naah Betis bawkin goal an khung leh a, William Carvalho chuan mawi zeta Rayo defender Alejandro Catena a bum hnuah an goal hnihna hi a khung a, 2-1 a ni.

Kum 1982 hnua a vawi khat nana Copa del Rey semifinal khel Rayo hian an goal hnihna an chhuah hmain Radamel Falcao chu bench aṭangin an luhtir a, mahse, Colombian striker hian a team a chhanhim thei lo.

Rayo hian kum 2020 khan Copa del Rey round of 32 aṭangin Betis hi an lo pet chhuak tawh a, March 3, zan dar 1:30-ah semifinal second leg khel turin Betis hi an lenchilh ve leh ang.

Copa del Rey Semifinal

First Leg
February 9, Nilaini Zan
Rayo Vallecano 1 - 2 Real Betis
RAY: Alvaro Garcia 5'
REB: Borja Iglesia 26';
William Carvalho 68'

February 10, Ningani Zan
(Result kan hre hman lo)
Athletic Bilbao 2:00 AM Valencia

Second Leg
March 2, Nilaini Zan
Valencia 1:30 AM Athletic
Bilbao

March 3, Ningani Zan
Real Betis 1:30 AM Rayo
Vallecano
*Away goal rule hman a ni lo