FC Goa-in Chennaiyin an sawp

Match nga zet a zawna an chak zawh tawh loh hnuin FC Goa-in Indian Super League-a an club hneh hnuhnung ber Chennaiyin bawk an hneh leh ta a, Nilaini zan khan South Indian club hi 5-0 ngawtin an sawp!

Goan club tan Jorge Ortiz chu a changtupa niin hattrick a siam a, Makan Chothe leh Narayan Das (own goal) ten goal khat ve ve an khung bawk - Chennaiyin lamin a chhanletna tur an nei lo a, ISL-a an tlawm chian ber ṭum an tawng.

Indian coach Derrick Pereira enkawlna hnuaiah Goa-in semifinal khelh beiseina chhete an neih chu an chhem nung ve leh ta sauh a, Chennaiyin pawh tlawm mah se an beisei a la bo tawp bik lo.

Goal a sur
Inkhel ṭan aṭanga minute rukna lekah Khasi tlangval Aiban Dohling chuan Chennaiyin box-ah ball a thlawh lut a, Manipur midfielder Chothe chuan ISL-a a goal hmasa ber ni turin a lo pet nghal a, a goal chiang hle.

Chennaiyin an tho tawh lo - minute 20-naah Ortiz chuan South Indian club tlarhnung buai karah an goal hnihna a khung a, minute 41-naah Alberto Noguera-a ball pet luh Anirudh Thapa-a lo dan per chu Ortiz-a ke bulah tak tlain an goal thumna a khung zui.

Goal thum an khung hnuah pawh Goa-in insum an tum lo. Atlético Madrid midfielder hlui Noguera-a ball thlawh luh chu Chennaiyin defender Narayan Das chuan an lamah a tauh lut a, chawlhlawk an hman meuh chuan 4-0 in Goa an fal der.

A hming Ortiz
Goa tan Ortiz a hmuhnawm a, Khasi tlangval khel ṭha em em mai Aiban Dohling-a'n a piancham a lawm emaw tih mai turin nuam ti takin a khel a, ṭha taka mual vei lam sir aṭanga ball a lakluh hnuin Ortiz tan a siamsak.

Spanish forward Ortiz-a'n minute 53-naah harsatna nei loin goal-ah a lo chantir a, hattrick a siam fel der - tun season-a match 12-a khelha goal sarih a khungna a ni a, assist vawi nga a nei bawk.

Goa tan Ortiz-a'n hattrick siam mah se Dohling-a hming a lam tel loh theih loh a, Meghalaya khaw pakhat Sohra tlangval hi left back-ah awmin an goal khung zinga goal thum chu a thawhchhuah tia sawi theih a ni - Chennaiyin tan Jerry Lalrinzuala'n bul a ṭan a, Mizo tlangval tan hriatreng tlak a ni lo.