Lazio tan Milan an thiam hret

AC Milan chuan an mikhual Lazio 4-0 a sawp chungin Coppa Italia semifinal an lut a, final lut tur chuan an elpui leh hmelma ni bawk Inter Milan an paltlang leh a ngai dawn a ni.

Nilaini zan San Siro-a inkhelah Olivier Giroud chuan goal hnih a khung, ani bakah hian Rafael Leao leh Franck Kessie ten khung bawkin nuamsa takin hnehna an chang, an hmachhawn leh tur Inter Milan hian AS Roma an lo hneh ve tawh bawk.

Milan hian Zlatan Ibrahimovic, Simon Kjaer leh Matteo Gabbia te hliam vangin an chhawr thei lo, player ṭha pahnih Fikayo Tomori leh Ante Rebic te chu inkhel bul ṭan turin an la inpeih tawk lo bawk - an ṭhat dan berin khel thei lo mah se buaina an nei lo thung.

Tun hnaiah Stefano Pioli naute an che ṭha chho leh ta hle. Serie A nomawi an la beisei sang a, Coppa Italia champion ni turin match hnih chak chauh an hmabak tawh bawk, an ban phak maiah nomawi pahnih a inhung.

Italian manager Pioli chuan, "Milan Derby-ah ropui takin hnehna kan chang a, kha khan inrintawkna nasa tak min siamsak. Season bul kan ṭan fuh a, a hnuah hnufual deuh lai nei mah ila ṭha taka kan tho chhuak leh thei hi a lawmawm," a ti.

Chak lo Laizo coach Maurizio Sarri chuan Milan an ngam loh chhan chu an rilru a nih thu a sawi ve bawk. Sarri chuan, "Match ṭha tak taka khelh kan nei ṭhin, a nihna takah chuan tun ṭum kan match-ah kha chuan kan rilru lamin a ngam lo.

"Inelna kal hmang hi a fuh tawk lo bawk. A nihna takah chuan FA Cup tih dan hi a ṭha. Coppa Italia-ah chuan engkim a lang tlang vek lo deuh, khelmual thlan chungchangah pawh TV entu tama kan ngaihtuah zawk, hei chu mi zawng zawng huap a ni lo," tiin a sawi.