Palace leh Norwich inhnehtawk

Nilaini zan Premier League inkhelah Crystal Palace chuan point thum hmuh theihna remchang an bawhpelh a, forward Wilfried Zaha-a'n penalty a hlah avangin an mikhualna ramah Norwich City nen 1-1 in an inhnehtawk.

Carrow Road-a inkhelah goal kan hmu hma hle, ṭan aṭanga second 38-na lekah Teemu Pukki chuan Norwich tan goal a khung - Premier League season kal laia goal lut rang ber a ni hial.

Tlak hlau Norwich lamin an goal hi an hum rei thei viau, mahse second half minute 60-naah Zaha chuan midfielder Michael Olise siamsak hmangin a sut a, goal luh aṭanga minute thum hnu lekah penalty an hlawh chhhuak zui.

Crystal Palace tan chak theihna remchang ṭha bik a ni. Mahse, penalty pet tura rawn ding chhuak Zaha chuan a lirin a pet a, goal ban hlat angreng takah na lo tein a lir chhuak; EPL penalty pet tawhah chuan a chhe ber zinga mi a ni hial ang.

Zaha chuan, "Ka ke vei lama pet ka tum a, ka rilru a insual buai. Ka tihsual avangin pawi ka ti a, ngaihdam pawh ka dil. Chutihrualin penalty ka hlah vawi khatna a ni a, a lehpekah chuan ka hlah tawh lo ang," tiin inrintawkna a la neih thu a sawi.

Nikum December 28 khan Palace hian Norwich hi 3-0 in an hneh a, a sang zual 10 zinga a inhlankai laiin Canaries chu table mawngphahah an hnutchhiah; tunah erawh Dean Smith-a'n a enkawl hnuah hma an sawn tih a lang.

Norwich City hi tla hniam thei zingah chuan an la awm, mahse an chunga mi Newcastle an phak lohna chu point khat chauh a ni. League match 15 ngawt khelh hmabak an la neih avangin inhamtang turin hun ṭha an la nei dawn.