MPL-in Serchhip a thleng ta ; Police-in best player rual chhawr dawn!

Mizoram Premier League season ruk khelh tawhah best player panga an awm tawh a, heng zinga pahnih R. Laldanmawia leh Lalramchullova te chu East Bengal tan an khel mek. Pathum dang R. Malsawmtluanga, Malsawmfela, leh F. Lalrinpuia te chu vawiin hian Mizoram Police tan an inlan dawn.

Tlai dar 2:15 hian Serchhip Sports Complex-ah Mizoram Police leh Chawnpui FC te an inkhel dawn. MPL kaithar Chawnpui hian vawi khat chiah hneh loh tawngin point sarih an hmu tawh a, Police aiin point khatin an hmu tam zawk bawk.

A ṭha thlan khawm
MPL best player ni tawh playmaker MS-a leh forward pahnih Sawmfela leh Valpuia te hi khelmuala an inlan vek a nih chuan Police jersey haa an khelh ho vawi khatna tur a ni a; amaherawhchu kum 12 liam ta khan team khatah an khelhho tawh. National Under 16-ah Mizoram tan khelin Chennai-ah final hial an thleng tawh a, Mizoram senior team tan an khel ho fo tawh bawk.

Police hian best player bakah top scorer pawh an kawl hnem hle. Ṭum hnih top scorer ni tawh Lalbiakhlua bakah Fakzuala leh Valpuia te an nei a, top scorer ni tawh an kawl loh chu Chhinga Veng forward MS Dawngliana leh Chanmari forward Laldampuia Tochawng te chiah a ni.

Police hian star rual an kawl tih chu a chiang a, goalkeeper-ah MPL best keeper ni lai keeper F. Lalmuanawma an nei a, tlarhnungah best defender kawl lo mah se Lalrinzuala Khiangte, Ronald Zothanmzama, Lalhmunmawia leh Lalruatpuia te tlarhnungah an rem thei a, kil tinah player ṭha vek an awm dawn.

Coach Lalbiaksanga Colney chuan, "Team ṭha tak kan ni a, hnehna chan ngei pawh kan tum ang. Chutihrualin a huhoa training neih ve theih a la nih loh avangin duh dan ang thlapa khelh chu a harsa," tiin Vanglaini a hrilh.

Match khatah hian player 20 ziah luh theih a ni a, Aizawl aṭangin player 14 an kal ang a, Thenzawl-a Police training-na hmun aṭangin player parukin Serchhip-ah an zawm ang.

Khel rawh se
Chawnpui coach Laldinthara chuan, "An player ṭhate hi khelhtir se kan ti. Match fitness an la neih loh avangin kan hlau lo," tiin Police hmachhawn tura an inpeih thu Vanglaini a hrilh a; Serchhip tlangval Vanlalnghenga'n inkhel bul a ṭan tur thu a sawi bawk.

Thara chuan, "Nghenga hi Serchhip tlangval a nih vanga inkhel bul ṭan tur a ni lo a, a thawhrimna leh a khelh tawhna thlirin starting eleven-a a awm hi a phu hrim hrim a ni," tiin a sawi.

Chawnpui hian MPL7-a match ruk an khelh tawhah vawi khat chiah chak loh an nei a, amerawhchu vawi khat tho hi an chakna zat a nih avangin point sarih chiah an hlawh chhuak.

MPL kaitharin result ṭha an neih thehna tur hian midfielder Vanlalthanga chu a ṭangkai a, Hualngohmun tlangval hian goal nga khung tawhin freekick aṭangin goal thum a khung tawh. Mizoram Police coach BS-a Colney chuan, "Thanga hi tun hnaiah a khel ṭha em em a, chuvangin ṭul loah chuan freekick chawi kan pumpelh a ṭul a ni," tiin Chawnpui lakah freekick aṭanga goal chhuah an tum loh thu a sawi.

Chawnpui coach Thara chuan, "Aizawla training kan neih hnuhnun berah eng nge Serchhip-ah kan tih dawn? tiin player-te a mal malin ka zawt a. Player tam zawkin kan inkhel dawn an ti a, mi tlemte in point thum hmuh kan tum dawn, an ti. Mi tlem te duh dan hi ka duh dan chu a n a, point thum hmu turin kan zin ang," tiin chak ngei an tum thu a sawi.

Entu chungchang sawi zuiin Thara chuan, "Chawnpui mi leh sa hnathawhna vanga Serchhip-a awm an awm nual a, ani hnen aṭanga hian ṭawiawmna kan neih theih kan beisei a. Anni zarah Serchhip mipui ṭhahnem takin min ṭan kan beisei a, min ṭawiawm ngei tur pawhin kan sawm a ni," tiin Serchhip mipui inkhel en turin a sawm.