Saurabh kutah gold medal

Indian shooter Saurabh Chau-dhary chuan Nilaini zan khan Youth Olympics neih meka 10m Air Pistol huangah gold medal a kap chhuak. Buenos Aires, Argentina-ah India tleirawl ten gold medal pathum an la ta.

Asian Games leh Junior World Champion-a gold la tawh Saurabh hian pakhatna ni tur hian point 244.2 a hmu a, a hnungah hian South Korea tleirawl Sung Yunho (236.7) leh Switzerland aiawhtu Jason Solari (215.6) te an awm bawk a ni.

Mizo nula Lalremsiami Hmar telna hockey team chuan Nilaini zan khan an pool match palina atan Argentina an hmachhawn a, a thlengtu ram lakah hian 5-2 in an chak lo. India hian nizan khan pool match hnuhnung ber atan South Africa an hmachhawn zui leh a, he thu buatsaih lai hian result kan hre hman lo.

Youth Olympic Games neih mekah India hian nimin tlai thleng kha chuan medal paruk an la tawh a, heng zinga pali chu shooting aṭanga an lak a ni. Gold pathum an lak zinga pakhat chu Mizo rawlthar Jeremy Lalrinnunga'n weightlingting huanga a chawi chhuah a ni.

Top 10 Table
# Nation Gold Silver Bronze Total
1 Russia (RUS) 16 3 2 21
2 Hungary (HUN) 8 1 1 10
3 Mixed-NOCs (MIX) 4 4 5 13
4 Japan (JPN) 4 3 3 10
5 China (CHN) 4 3 2 9
6 Italy (ITA) 3 5 7 15
7 India (IND) 3 3 0 6
8 Romania (ROU) 2 2 3 7
9 Colombia (COL) 2 2 2 6
10 Ukraine (UKR) 2 0 1 3