Roger Federer a chak hram

Shanghai Masters champion lai Roger Federer chuan a match hmasa berah fiahna hautak a hmachhawn nghal a, seeded pakhatna hian Daniil Medvedev chu 6-4, 4-6, 6-4 a hnehin last 16 a inhlangkai.

Thla hmasa a khelh zawh tak US Open fourth round aṭanga a tlak hnuah Federer hian a match hmasa ber a khel leh chiah a, set hmasa berah Medvedev-a service chu vawi hnih a chhuhsak nghal.

Mahse, set hnihnaah erawh Swiss thiampuipa a che fuh lo zawkah a ṭang; a pawimawh ber set thumnaah erawh Federer-a'n a tawnhriat neih hnem chhawr ṭangkaiin a khingpui service vawi khat a chhuhsak leh a, darkar hnih tling lo deuhah hnehna a chang thei hram.

Grand Slam vawi 20 champion tawh Federer hian a match lehpekah chuan Roberto Bautista Agut a hmachhawn leh ang. Spanish tlangval hian Mackenzie McDonald chu 3-6, 6-4, 6-1 in a lo hneh ve thung a ni.

Inkhel dangah Alexander Zverev chuan Nikoloz Basilashvili a hneh ve thung a, German tlangval hian 7-5, 6-4 a hnehna a chan avang hian season tawpa khelh tur ATP Finals-a inlan thei turin a dinhmun a sawhnghet chho zel. Juan Martin del Potro pawhin Richard Gasquet chu 7-5, 7-6(7) in a hneh ve bawk.

Nimin khan British number 1 Kyle Edmund chuan Nicolas Jarry chu 7-6 (7-5), 6-3 a hnehin quarterfinal a in vaw kai. World number 14 hian set khatna la turin tie break a thlenpui ngai mah se, set hnuhnung zawkah erawh 2-0 a hma hruai nghalin harsatna a tawk lo - a match lehah chuan Zverev nen an intawng ang.