I League khelh hun tur a chiang ta?

India rama club football inelna sang ber I League khelh hun tur a chiang ta a, Ocotber 26 khian I League match hmasa ber khelh a ni dawn.

All India Football Fede­ration (AIFF) lam chuan I League fixtures chungchangah thuchhuah engmah a hranpain an la siam lo a, tuna fixture chhuak hi club ho hnena pek niin a hnuah AIFF-in thuchhuah chiang zawk an la siam leh ang.

Tun dinhmuna a lan dan chuan Aizawl FC-in khualmualah an zinkawng an zawh ṭan dawn a, Shillong Lajong chu October 28-ah an league match hmasa ber an khelhpui dawn a ni.

I League opening match chu Chennai City leh Indian Arrows ten October 26-ah an khel dawn a, Coimbatore khawpuia an awmhmun sawn South Indian club hian AIFF hnuaia rawlthar rual hi tlai dar 5:00-ah an mikhual ang.

AFC dinhmun

Aizawl FC-in an match hmasa berah, mikhual tana khelh harsatna hmun Shillong-ah match an nei nghal dawn a, Mizo club zinkawng hi a awlsam dawn lo.

Mizo mipuiten tun season-a mahni mual ngeia I League kan en hmasak ber tur chu November 3-ah a ni dawn a, Rajiv Gandhi Stadium-ah Neroca an lo mikhual ang.

North East club zinga I League champion hmasa ber club hian November 7-ah Mohun Bagan an tlawh chhunzawm lehnghal dawn a, Mizo club-in season ṭantir lamah derby match hnih bakah Bagan an tawng dawn tihna a ni.

Club 'lian'

I League-ah 'club' lian chungchang sawi a nih chuan Mohun Bagan leh East Bengal hming lamrik a ni ṭhin a, Kolkata club pahnih hian away-ah bul an ṭan ang.

October 27 khian club pahnih hi an zin chhuak ve ve dawn a, Bagan-in Gokulam Kerala FC an lenchilh ang a, East Bengal-in Imphal-ah Neroca an lenchilh thung dawn a ni.

Champion lai Minerva Pun­jab-in tun season aṭangin Chandigarh khawpuiah an khel tawh dawn a, October 28 khian an match hmasa berah Churchill Brothers an mikhual ang.

Hello Kashmir!

Second division champion Real Kashmir FC-in tun season aṭangin I League an khel tawh dawn a, anni hi Jammu & Kash­mir aṭanga I League khel tura inpetkai thei hmasa ber an ni.

Scottish coach David Robert­son enkawlna hnuaia khel team hi a tirah Delhi khawpuia home match khel tur angin sawi awm mah se tuna ruahman chhinna ang chuan Kashmir-ah ngei an inkhel dawn.

Real Kashmir hian Novem­ber 6-ah Churchill Brothers an mikhual dawn a, a hmun a hlat piahlamah a vawh bawk avangin Srinagar khawpuia inkhelh hi a harsa khawp ang.

A behbawm

Tun dinhmuna a lan dan chuan match-te hi tlai dar 2, 5 leh zan dar 7:30-ah te khelh tur a ni dawn a, ni khata dar zat in anga match khelh a awm meuh lo a, Indian Super League lam fixture nena insu buai lo tura ruahman a ni bawk.

Star Sports-in match zawng zawng live-in a pe chhuak dawn em tih a la chiang lo a, fixture ruahman chhinnaa a lan dan aṭanga teh chuan Star Sports lamin harsatna nei loa an live zel theih nan a hun pawh hi an ruahman niin a lang.

Online kaltlangin I League hi a en theih dawn bawk a, Hotstar chuan online-a en theih turin a pe chhuak ṭhin dawn a ni.

Break awm lo

India-in nakkumah AFC Asian Cup a khel dawn a, Indian Super League chuan hei hi rilruah dah ranin January-ah league khelh a ni dawn lo. Hei mai hi a ni lo a, international break neih a nih apiangin October, November leh January-ah te break neih ve a ni bawk ang.

I League erawh January-ah pawh khelh a ni dawn a, international break neih a nih hunah chawlh an nei ve dawn lo bawk - tun dinhmuna a lan dan chuan I League club player chu India tana inlan tura koh a nih chuan club-in an tuar zel mai dawn a ni!

March 2019-ah I League hi khelh zawh hman tura ruahman a ni. Mahse, tarlan angin tuna fixture chhuak hi AIFF chuan official-in a la puang chhuak lo a, thlak danglam leh theih a ni - thlak danglam a awm a nih pawhin danglam erawh a danglam tam lo ang.