Olympic 2020-ah raltlan inlan dawn

International Olympic Committee chuan Japan khawpui Tokyo in a thlen tur Olympic 2020-ah raltlan (refugee team) an inlan theih tur thu an puang, Rio Olympic-ah pawh khan raltlan hi a huhoin an lo inlan tawh bawk a ni.

IOC president Thomas Bach chuan, "Tunlai khawvel dinhmun kan ngaihtuah chuan, Olympic kan neih leh turah hian refugee team awm leh ngei se a ṭha, IOC hnuaia ram 206 inziak lut zinga mi, anmahni ram aṭanga harsatna nei vanga raltlante chu an duh a nih chuan a huhoin an inlan leh thei ang," a ti.

Brazil khawpui Rio-ah khan Syria, Congo, Ethiopia leh South Sudan aṭanga raltlante chu an lo inlan tawh a, Tokyo-ah pawh hian athletics, swimming leh judo huangah te an inlan leh ang.