Aizawl FC hmaah Bethlehem Vengthlang

Serchhipah Aizawl FC leh Bethlehem Vengthlang FC-in inkhel bul an ṭan dawn.

I League-a champion thei hi North East-ah pakhat chiah an awm, chu chu Mizo club Aizawl FC an ni. I League club hian foreigner pathum captain Alfred Kemah Jaryan bakah player thar pahnih Kyrgyzstan midfielder Bectur Targat Uulu leh Liberian forward Ansumana Kromah te nen vawiin chawhma dar 11:30 hian Serchhip Sports Complex-ah an inlan dawn a, Serchhip mipui hmaah eng ang chiaha ṭha nge an nih tih chu Bethlehem Vengthlang FC hmaah fiahin a awm ang.

Mc Dowell’s No. 1 Soda Mizoram Premier League Season 7-ah Aizawl FC hian point kua hmuin palinaah an awm mek a, an khingpui tur BVT hian point hnih chiah an la hmu thung. Point aṭanga teh chuan I League club tan awlsam taka point hlawhchhuahna tur a ni a, amaherawhchu chutiang ngawt chu thil thlen dan tur niin a lang lo.

BVT an te ber lo!

MPL7 ṭan hma chuan Electric Veng, Chawnpui FC leh BVT hi table hnuai lama awm tura ngaih an ni a, season ṭan hnuah erawh MPL kaithar pahnih EFC leh Chawnpui ten tualchhung ngainatute beisei phak bakin result an nei ṭha. Bethlehem Vengthlang erawhin point an hlawh tam tawk lo a, amaherawhchu an khelh dan aṭanga thlir chuan point hnih lek hlawh chhuak tur an ni lo.

Chutihrualin BVT hi tuna an awmna

aṭanga teh tur pawh ni ta reng se season ṭan hmaa champion inbeisei Ramhlun North nen match hnuhnung berah an inhnehtawk a, table mawngphah pumpelh nan RNFC chungah goal difference hmangin an la awm bawk.

A phur ṭan

BVT-in October transfer-ah midfielder Lalchhuanpuia, forward Lalmuanzova leh left back Amos Lalnienga te an lalut a, Chhuanpuia leh Muanzova ten match hnuhnung bera Ramhlun North nen 2-2 a an inhnehtawk ṭumin hmun pawimawh an chang nghal. Aizawl FC hmachhawn hunah Amos-a hi mamawh dan a zira chhawr theih a ni tawh bawk.

I League club goal nawr na tak dang turin MPL5 best defender H. Lalhlimpuia chu Ramhlun North nen inkhel bul a ṭan tawh a, coach leh player ni kawp Hlima hi defence laiah AFC defender hlui Jonathan Lalhriatkima nen an inkawp leh a rinawm a, hemi hmaa Chhuanpuia a awm bawk chuan paltlang a awlsam dawn lo.

BVT hian loan hmangin Shalom Lala an la tawh bawk a, goal hnih khung tawh Laldinliana Varte ten striker lian ṭha Muanzova chu ding leh veiah an thlawp thei dawn. Coach Hlima chuan, “I League club pawh ni se attacking game kan khelh ngam lohna chhan tur a awm lo a, point thum hlawhchhuah tumin kan khel dawn a, a chhe berah draw kan tum ang. Keini chuan player langsar bik kan kawl ve lo a, kan thawhhona ṭha hi kan hmachhuan ber a ni,” tiin Vanglaini a hrilh.

Bethlehem Vengthlang hi Serchhip thleng hmasa ber niin Nilaini khan inelna neihna hmun tur an thleng tawh a, zan khat hahdam hnuah nimin lamah training ṭha tak an nei leh thei bawk. Assistant coach Lallawmkima (Tea) an la thar a, coach Hlima khelmuala a inlan a ṭul avangin Dinthar player leh coach hlui Durtlang tlangval Tea an lalut hi an ṭangkai pui khawp ang.

En tham player

Aizawl FC-in mimal tak pawha hmuh châkawm player an kawl nual. MPL7 bika goalkeeper la che ṭha bera chhal ngam Gurpreet Singh leh foreigner pathumte chu Serchhip mipui tan en a châkawm lehzual ang.

Liberian forward Kromah hian Churchill tana a khelh laiin Aizawl FC lamah hian RG Stadium-ah goal a lo khung tawh a, hemi hnu hian Indian ram club ṭha Mohun Bagan tana a khelh leh tawh bawk avangin a inlan a nih phawt chuan en bik tlak a ni ang. I League bakah chuan Kromah hi player che rang tia sawi a ni, MPL-ah a che rang tho em tih chu a hriat thuai dawn.

Foreigner dah ṭhat pawhin Aizawl FC an la hmuhnawm dawn tho. Tlarhnungah Mizoram aiawh vawi tam fehchhuak tawh Lalrinchhana Tochhawng a ding dawn a, mipui hmuhnawm tih zawng tur erawh winger Isaac Vanlalruatfela leh F. Lalremsanga te chevel a ni ang. Thingsulthliah rawlthar Isaac-a hian ball a thiam a, a che rang bawk. Lengpui tlangval Remsanga pawhin theihna a nei sang a, MPL7-ah goal thum khung tawhin amah aia tawnhriat nei ṭha zawk Kelkang tlangval Lalkhawpuimawia nen an inkawp dawn bawk avangin BVT tlarhnung tan an tawrhlelhawm khawp ang.

Amaherawhchu, heng player ṭha tak tak te hian Aizawl FC kawr an hak miau avangin mawhphurhna a sang a, point thum bakah Serchhip mipui lungawina khawp game mawi lantir an tum bawk ang.