UEFA Nations League ; Europe ramte sum dawn tur a pung

Europe rama football thuneitu sang ber UEFA-in awmze nei zawka international football kalpui a nih theih nan UEFA Nations League a duang a, he inelnaa tel ram 55-te sum dawn tur chu a pung dawn.

UEFA chuan Nations League-a champion team hian pound maktaduai 9.18 zet an dawng dawn a, a hmaa an dawn tur zata ruahman pound maktaduai 6.55 nena khaikhin chuan a punna hi a tam tham hle.

Nations League-a sum a punna chhan ber hi UEFA sum dinhmun ṭhat vang a ni a, Euro 2016 aṭanga an sum hmuh te a tam vang a ni tel bawk.0

Peng leh lawk ila

UEFA Nations League-ah hian promotion leh relegation a awm ve vek a, European national team 55 te chu league pali-ah 11 October 2017-a an ranking dinhmun milin ṭhen sawm an ni.

League A - D thlengin ṭhen a ni a, League A-ah hian team ranking sang rual awmna niin D erawh ranking lama a hniam rual awmna a ni thung. League tinah ram te chu group paliah ṭhen leh vek an ni.

Nations League-ah hian ram ṭha rual awmna League A ho bik tan 'Finals' a awm dawn. League A group tina champion te hian semifinal an khel ang a, final lut tur an zawng leh ang.

League A final-a champion hi UEFA Nations League champion an ni dawn tihna a ni a, champion team-in league an khelh chhunga an sum dawn tur zawng zawng belhkhawm hi pound maktaduai 9.18 zet a ni ta tihna a ni.

Sum sem dan

League A-ah team 12 an awm a, a tirah chuan league sang bera an awm vang hrim hrima an sum dawn tur zat ruahman hi £655,000 a ni. Mahse, UEFA-in a tihpun takah chuan League A-a inlan hrim hrim team hian pound maktaduai 1.9 an dawng ang.

Pool tina an group hmahruaitu ṭheuh sum dawn tur pawh 50% ngawtih tihpun a ni a, chumi awmzia chu League A-a group hrang hrang palia pakhatna ṭheuh chuan pound maktaduai 1.9 an dawn belh dawn tihna a ni.

League hniam ber D-a awmte tan pawh sum a tam dawn a, group champion ṭheuhin £655,775 an dawng pha dawn. League C-a group champion ṭheuhin £980,000 an dawng pha ang a, League B-a group champion ten pound maktaduai khat chuang ṭheuh an dawng bawk ang.

UEFA chuan, "UEFA Executive Committee chuan sum dawn tur tipung tur hian thutlukna a siam a, hei hi UEFA sum dinhmun ṭhat vang leh Euro 2016-a kan sum lakluh ṭhat vang a ni," tiin an sawi.

Tichuan...

International break neih a nih apiangin Nations League khelh a ni a, zaninah pawh khelh a ni dawn a, inkhel hmuhnawm hmuh tur a awm dawn.

Zanin dar 12:15-ah Croatia mualah England an inkhel dawn a, dar 12:15-ah vek hian Croatia leh England an inkhel bawk ang. England leh Croatia inkhelhna hi fans-in a hmunah an en thei dawn lo. Hei hi UEFA-in Croatia a hrem vang a ni.

World Cup finalist Croatia hi kum 2015 khan Euro qualifier-ah Italy nen an inhmachhawn a, khelmualah politics lam hawi zia rang an pholan avangin hrem an ni.

Croatia hrem an nihna hi July 2015 daih tawh khan a ni a, an home match hmasa pahnih chu entu awm loa khel tura tih an ni a, hei hi an la hman zawh loh avangin entu awm loin England an khelh a ngaih phah.

Inkhel tur chu

World Cup semifinal-ah khan England leh Croatia hi an lo intawng tawh a, Moscow khawpuia mipui 78,000 hmaa inkhelah hian extra time-a Mario Mandzukic goal khung hmangin 2-1 in Croatia an chak.

Tunah erawh engkim a danglam tawh - Moscow-a chakna goal khungtu Mandzukic-a'n ram tana inkhelh a chawlhsan tawh a, Croatia tana si ban nghaktu rinawm Danijel Subasic chuan ram tan a jersey a hlip tawh bawk.

England squad pawh a danglam tawh. Borussia Dortmund tana season duhawm tak hmangtu Jadon Sancho chu a vawi khat nan koh a ni a, Leicester City playmaker James Maddison pawhin Foxes tana a khelh ṭhat chhawrin koh a ni.

Championship lama khel, Chelsea aṭanga Derby County tana loan-a khel mek Mason Mount chu koh a ni bawk a, anni bakah hian Fulham keeper Marcus Bettinelli, Southampton keeper Alex McCarthy leh Watford midfielder Nathaniel Chalobah-te chu ram tana la inlan ngai lo player an ni.