Monaco manager ni thei zingah Henry

Arsenal striker hlui Thierry Henry chu AS Monaco manager thar ni thei zingah hming langsar a ni mek, Ligue 1 club enkawl mektu Leonardo Jardim chu ban la ni lo mah se hun rei lote hnua a hna chan thei dinhmunah a ding mek.

French club hian beisei angin season bul an ṭan lo, kum 44 mi Jardim kaihhruaina hnuaiah match kua an khelh aṭangin point ruk chauh an la hmu a, league table-ah a mawng lam aṭanga chhiarin pathumna an ni! Insiamṭhat an duh a nih chuan an manager hi an thlak ngei dawn niin khawthlang media te chuan an tarlang tawh.

Kum 41 mi Henry hian Belgium assistant coach a nihna chu World Cup zawh rual khan a bansan a, Championship club Aston Villa enkawl tura ngaih a ni hman. Mahse, Villa hian mnaager thar an nei a, anni nena sawi zawm Henry hi an ram club nen sawizawm a ni leh ta zawk.

France international hlui Henry hian Monaco-ah hian professional career bul a ṭan a, 1997 khan Ligue 1 nomawi a chawipui - hemi hnu hian Italian club lian Juventus panin a hnuah Arsenal leh Barcelona tan a khel - a bulṭan tawhna hmunah a kir leh a nih pawhin a mak lo ang.

Henry-a’n a thlak tur anga an sawi Jardim hian 2014 khan Monaco a enkawl ṭan a, Sporting Lisbon manager hlui hian 2000 hnua a vawi khat nan 2017 khan league champion a nihpui thei a, hemi season hian Champions League semifinal an lut phak bawk.

Amaherawhchu, Monaco hian hlawh-tlinna an chan ṭuma an player pawimawh Kylian Mbappe, Thomas Lemar, Tiemoue Bakayoko, Bernardo Silva leh Benjamin Mendy te an chan vek.