James-a khelhna Lakers-in GSW hneh

NBA regular season atana an inbuatsaihna mai ni mah se LeBron James khelhna LA Lakers in Golden State Warriors an hneh hi khawthlang media-te titi a tling. Nimin zing khan Lakers hian NBA champion lai hi 123-113 in an hneh a ni.

American star James hian a club thar tan point 15 a luh bakah, rebound vawi 10 lain assist vawi nga a nei bawk. Warriors pawhin an player neih ṭhat an khelhtir - Steph Curry chuan point 23 neiin, Klay Thompson (20) leh Kevin Durant (18) te pawh an khel chhe lo. Mahse, Lakers team an ṭangrual a, thawhhona ṭha an chakpui.

James hian season hmasa tawp rualin Cleveland Cavaliers a chhuahsan a, free agent a nih avangin a duh lam a hawi thei. Rin loh tak maiin kum li chhung atan Lakers a zawm a, basketball court pawn lam boruak dawn duh vanga LA pan anga an sawina chu court chhungah a chhang let dawn niin a ngaih theih.

Kum 33 mi James chuan, "Player kan awkhawm a nih chuan nuam ti takin hun kan hmang a, a bik takin court chhungah induhsak taka kan khel ho a nih chuan a nuam zual hle," a ti. NBA champion chungchang erawh sawi lawk theih a nih loh thu leh, pre season game chu an dinhmun teh nan a rintlak rih loh thu a sawi bawk.