FIFA Club World Cup final ; Zanin dar 10-ah Chelsea Vs Palmeiras
FIFA Club World Cup final chu zanin dar 10:00 hian Chelsea leh Palmeiras ten Mohammed Bin Zayed Stadium, Abu Dhabi-ah an khel dawn. Club pahnih hi Club World Cup-a la champion ngai lo ve ve an nih avangin nomawi hlutna a sang sawt ang.
African champion Al Ahly leh Asian champion Al Hilal ten zanin dar 6:30 hian Al Nahyan Stadium, Abu Dhabi-ah pathumna an zawng ve bawk ang.
Dream final
Club World Cup-ah FIFA hnuaia khawlmualpui paruk champion bakah inelna thlengtu club an tel a, team pasarihin nomawi an inchuh. European champion leh South American champion hi dah san bik an ni a, semifinal aṭangin an khel ṭan.
Tun ṭum final-ah hian inelna ṭan hma aṭanga final inhmachhawn tura beisei sa Chelsea leh Palmeiras te an inkhel dawn a, hemi a nih avang hian dream final tia chhal theih a ni.
Kepa nge Mendy
Chelsea match hnuhnung pahnih thlir kir chuan Kepa Arrizabalaga-a'n final khelh a phu. Spanish keeper hian FA Cup-a Plymouth Argyle an hneh ṭumin hun tawp dawnah penalty a dang a, Club World Cup semifinal-ah Al Hilal lakah a clean sheet - save ṭha ṭum thum a nei.
Amaherawhchu Edouard Mendy hi first keeper a ni a, AFCON-ah Senegal a champion pui bakah best keeper atan an thlang. Kum 29 mi Mendy hi champion lawmnaah pawh tel loin Abu Dhabi lamah a thlawk chho nghal a, an chhawr leh si loh chuan a lungawi kher lo ang.
Final chu
Chelsea-in assistant manager Zsolt Low uapna hnuaiah Al Hilal 1-0 in an hneh a, Romelu Lukaku-a'n goal awmchhun a khung. Blues hian awlsam takin Saudi club an hneh thei lo a, team ṭha zawka ngaih Palmeiras hneh tur chuan insiamṭhat an mamawh khawp ang.
London club hian an la champion ngai lohna Club World Cup an khelh danah pressure an nei tih a lang a, goal hmaa an hriam tawk loh bakah ball an inpek kual danah ṭha zawkin an la khel thei tih a lang.
Palmeiras pawhin awlsam takin Al Ahly an hneh bik lo a, chutihrualin Blues ang thoa an clean sheet bakah goal hnih an khung. Brazilian midfielder Dudu a hmuhnawm a, goal mawi bik a khung bakah Raphael Veiga khung tur a siamsak bawk.
Blues assistant manager Zsolt Low chuan, "Kan khingpui tur Palmeiras hian ṭantu an nei ṭha. Entu 15,000 tal chu an neih theih ka ring. Stadium chhung boruak a nung ṭha dawn a, chutihrualin Champions League bakah final lian tham kan khelh tawh avangin tawnhriat kan nei ṭha," tiin a sawi.
Brazilian club Palmeiras hi
Palmeiras hi kum 1914 khan Sao Paulo-ah Italy aṭanga pem khawmten an din a, kum 100 chhungin Brazil leh ram pawnah hlawhtlinna ṭhahnem tak an chang. Ram chhung inelnaah league cham-pionship-ah vawi 10 an champion tawh a, champion ngun ber niin Brazilian Cup chu vawi li an chawi tawh bawk.
Khawmualpui inelnaah chuan South American champion vawi thum an ni tawh a, kum 1999 khan a vawi khat nan Colombia club Deportivo Cali hnehin an champion. Inelna hnuhnung pahnihah Brazilian club Santos (2020) leh Flamengo (2021) hnehin an champion leh bawk.
World champion?
Palmeiras elpui Corinthians, Sao Paulo leh Santos ten FIFA Club World Cup emaw Intercontinetal Cup emaw an champion tawh laiin khawvel pum huap inelnaahPalmeiras-in nomawi an la chawi ve lo.
Chutihrualin Palmeiras hi kum 1951 Copa Rio-a an champion khan world champion-ah an inchhal a, hetihlai hian Club World Cup leh tun hma lama neih ṭhin Intercontinental Cup a la awm lo. Intercontinental Cup-ah erawh kum 1999 khan an khel a, Tokyo-ah Manchester United 1-0 in an hneh lo. Nikum khan Club World Cup-ah an tel a, semifinal-ah Mexican club Tigres hneh loin an tla a, pathumna zawnnaah Egypt club Al Ahly an hneh lo leh bawk.
FIFA Club World Cup
Thlirna Tawi
First Round - February 3, Ningani
Al Jazira 4–1 AS Pirae
ALJ : Zayed Al-Ameri 5'; Ahmed Al-Attas 25'; Milos Kosanović 41'; Abdoulay Diaby 63'
ASP : M'hammed Rabii Rabii 48' (OG)
Second Round
February 5, Inrinni
Al Ahly 1 - 0 Monterrey
ALA : Mohamed Hany 53'
February 5, Pathianni
Al Hilal 6 - 1 Al Jazira
AlH : Odion Ighalo 36'; Matheus Pereira 40'; Mohamed Kanno 57'; Salem Al-Dawsari 77'; Moussa Marega 88'; Andre Carrillo 90+2' (pen.)
AlJ : Abdoulay Diaby 14'
Semifinal
February 8, Thawhlehni
Palmeiras 2 - 0 Al Ahly
PAL : Raphael Veiga 39'; Dudu 49'
February 9, Nilaini
Al Hilal 0 - 1 Chelsea
CHE : Romelu Lukaku 32'
Zanin Inkhel tur
Third Place
Al Ahly 6:30 PM Al Hilal
Final
Palmeiras 10:00 PM Chelsea