Player kim lo Arsenal an chak
Hun tawp lam minute 20 chhung player kim loin khel mah se Arsenal an ṭang tlang thei. Gunners hian Ningani zan inkhelah defender Gabriel-a goal khat hmangin Wolverhamton Wanderers chu 1-0 in an luahchhuah.
Gabriel Martinelli hnawhchhuah a nih danin sawi zui a hlawh a, a pawimawh ber point thum erawh Gunners lam chan a ni. Mikel Arteta naute hian Manchester United tlan pelin Premier League-ah pangana dinhmun an luah ta.
North London club hi an chunga awm West Ham aiin match hnihin an khel tlem zawk - Hammers an phak lohna hi point khat chiah a ni. A tawi zawnga sawi chuan, season thara Champions League khelh phak leh phak loh chu an kuta innghat a ni.
Goal khat a tawk
Arsenal hian kuminah goal khung an harsat, defender Gabriel-a'n Alexandre Lacazette-a tih per a lo tlawh luh zauh kha kumina goal hnih an khungna chauh a ni a, 2022 bika an chakna hmasa ber an tawng chiah bawk.
Wolves erawhin vanduai an inti thei ang, nikum October thla hnuah a vawi khat nan Premier League-ah first half chhungin goal an chhuah leh chiah, chu pawh inven theihna tura ngaihah an inven ṭhat tawk loh vang a ni.
Arsenal keeper Aaron Ramsdale-a'n Romain Saiss leh Leander Dendoncker te khung tur ṭha takin a dansak a, goal line aṭangin Chiquinho-a pet an lo dansak hman bawk. Chutihrualin Lacazette-a'n keeper chauh a hmachhawn hnua a khung loh erawh a ho hle.
Gabi an hnawhchhuak
Minute 69-na a ni a, rang taka Daniel Podence-a'n ball theh (throw) a tum chu Martinelli hian lo tibuaiin a nam thlu, ball erawh a kaltlang. Ball changtu Chiquinho chu hnung lam aṭangin a nek tlu leh nghal.
Referee Michael Oliver-a'n hamrik a ham a, thil thleng pahnihah chuan yellow card pahnih a pe - a belhkhawm chu red card a ni. Thil thleng hmasa zawka inkhel thi tawp si loin, a hnuhnung zawkah a hlawmin a hrem tihna a ni.
Arsenal manager Arteta chuan, "Premier League hi kum 18 chhung ka chenchilh tawh, khatiang thil kha ka hmuh vawi khatna a ni, kha thil vang khan hun tawp lam minute 10 chhung chu kan buai takzet," tiin a sawi.
Arsenal leh red card
Kum 2022 bikah Arsenal hian goal hnih chauh an la khung laiin red card erawh vawi li an hmu tawh thung! Arteta-a'n 2019 December thla khan North London club a enkawl ṭan a, red card vawi 15 an hmu tawh - anmahni hnaih bertu aiin vawi sarihin an hmu hnem zawk.
Arteta chuan, "Premier League inkhel hautak taka kim lo chunga hnehna chan chu a harsa hle, hetiang thil hi kan titawp tur a ni. League match khelh hmabak 16 kan la neihah chuan hun tawp thleng player kima khelh kan tum ang," a ti.
Gunners hi an vanduai ṭum chu ni se chak lo thei an ni. Granit Xhaka-a'n anmahni lama tih luh chu Raul Jimenez-a offside vangin hnawlsak an ni a, goal khung theihna remchang insiam nual mah se Ben White leh Gabriel te ding dun an paltlang thei lo.