Zua zalenna zawngtu Rooney

ngland-in footballer a neih ṭhat hming lam a nih apiangin lam tel a ni ziah tawh ang a, Manchester United player ropui sawi a nih apiangin tlarhma a hauh ṭhin ang - a hming chu Wayne Rooney a ni.

Everton aṭanga hming chher a, Old Trafford hlim taka lamtir ṭhintu kha a ni a, England fans beiseina siamtu, Lionel Messi leh Cristiano Ronaldo te nen huang khata leng tura tam takin an ngaih kha!

Mahse, kha rawlthar duhawm kha thinrimnain a thinlung an luah ṭhin a, chu chu khelmual chhungah pawh hmuh tur a awm fo. Player tam tak tan a thlen chin ringawt pawh hi mang ramah bak thlen phak ni lo mah se, kha thinrimna khan a nih tur ang a nih tir lo em ni? tih chu football khawvela reh tawh lo tur zawhna a ni.

Kha rawlthar, khawvela club ropui ber pawla khel a, a duh apiang a nei emaw tih mai tur kha engvanga thinrim ṭhin nge a nih? A goal khung avanga a hlim nui hmel phenah khan enge awm a, kha ropuina phenah khan enge inthup awm? Khawvelin a chhan hriat a châk a, rei tak hnuah a chhanna pek kan ni ta.

A hma em a ni
Croxteth, Liverpool-a sorkar chenna tur insaka seilian ve mai kha a ni a, mahse, football chuan a beisei aia hmain ropuina hmunah a hlangkai. October 19, 2002 khan Everton chuan 1-0 in match 30 chhung tlawm tawh lo Arsenal an hneh a, goal khungtu chu ni nga leka kum 17 la tling lo Rooney a ni.

Arsenal manager Arsene Wenger chuan, "Kum 20 hnuai lam, ani anga player ṭha hi England-a ka rawn kal hnuah ka hmu lo," tiin a fak zui a, he season-ah hian inelna hrang hrangah match 37 khelin goal riat a khung nghal.

February 12, 2003 khan ram tana a match hmasa ber a khel zui a, kum 17 leh ni 111 mi niin England tana inlan thei naupang ber a ni. September 6, 2003 khan UEFA Euro 2004 qualifying match-ah Macedonia laka goal khungin kum 17 leh ni 317 mi a ni a, Three Lions tana goal khung thei naupang ber a ni.

Rooney chuan, "Kan seilenna hmun ropui lo tak aṭanga kum 16 lek ni chunga Premier League player nih a, ram tana inlan kha a thleng hma lutuk a, ka inpeih hman lo a ni," a ti a, a career ṭantirah a buai thu a sawi.

Hriat loh ram
Kum 2004-ah pound maktaduai 27 nen Manchester United an lo lang a, a hunlaia kum 20 hnuai lam player man to ber ni turin an lei chhuak. Rooney hian a match hmasa berah Champions League khelin Fenerbahce an hmachhawn a, hattrick a siam nghal - a lar dan chu pui tak a ni.

Rooney chuan, "Footballer nihnain a ken tel lehlam kha ka la hre lo a, khatiang taka mipui ngaihven ni tur khan ka inbuatsaih hman lo. Rei tak chhung chu ka talbuai a, hriat ngai loh hmunah in dah luh ang mai a ni a, ka tan chuan a harsa takzet a ni," a ti.

English striker-in hattrick a siam lai hian kum 18 leh ni 335 mi chauh a la ni a, professional football-in a ken tel sum tam tak leh larnain a nun a tibuai hi a awm lo hran lo.

Rooney chuan, "Manchester United-a ka hun hmasa lam, a bik takin kan fa hmasa ber Kai a pian hma kha chuan room-ah ka inkhung hrang tawp a ni ber a, pawnah pawh ka chhuak ngai lo. Chawlh kan neih chang chuan room-ah ka inkalh khum a, ka chunga thil thleng zawng zawng theihnghilh tumin zu ka in ṭhin," a ti.

Chawlh lohna ningzu!
Rooney-a'n hahdamna beiseiin 'chawlhtuiningzu' a dawn a, mahse, chawlhna leh hahdamna a hmu chuang lo. United tana goal 253 khung a, goal khung hnem ber record chelh mektu chuan, "Mite chuan a changin zu ka in ve ṭhin a, chhuah pawh ka chhuak ve ṭhin tih an hria ang.

"Mahse, chu ringawt chu a ni lo. Ka ngaihtuahnaah chuan thil tam tak a awm a, ram leh United tana ka khelh avanga pressure ka neih te, ka mimal nun media hrang hranga darh te, chung zawng zawng chuan min tibuai ṭhin a, a harsa ṭhin hle," a ti a, mi tam takin nuam tura an ngaih lai khan a nun chuan tuma hriatpui lohin indona a lo hmachhawn reng a lo ni.

Rooney chuan, "Keimah mai khan chin fel ka tum a, ka seilenna hmun ngaihtuah ula, mi zinga va kal a, harsatna sawi chi ka ni lo. Midang puihna tel loa mahnia talchhuah kha ka tum a ni ber mai," a ti a, mahnia chinfel a tumna chu a hlawhtlinpui lo niin a lang.

Derby County coach ni ta Rooney hian a vanglai khan ram tan match 120 khelin goal 53 a khung a, Three Lions tan ani aia goal khung hnem tun thlengin an la awm lo - mahse, a chhungril nun erawh a lo ruak em em si.

A hahdam ta
Rooney-a'n United tan a khelh laiin Premier League nomawi ringawt pawh vawi nga a chawi a, Champions League (1), Europa League (1), Club World Cup (1), FA Cup (1), League Cup (3) leh Community Shield (4) ah te nomawi a chawi a, mahse, a harsatna sawi chhuak turin a huaisen tawk ngai lo.

United a chhuahsan hnua Everton, DC United leh Derby tana khel zui striker chuan, "Tunah chuan an harsatnate sawi chhuak turin mi pawh an chak tawk tawh ang. Kan hunlaiah kha chuan, dressing room-a kal a, khatianga harsatna sawichhuah kha thil harsa a ni.

"Mahniin ngawi rengin kan tuar a, kan lungngaihnate inbun ruah ai chuan a ruka tuar kan thlang mai ṭhin," a ti a, chutianga awm chuan a ṭha lam aiin a chhe lama nghawng a neih nasat zawk thu a sawi - rilru hahna leh manganna neihin, mahnia tuar mai loa hmangaihtute kianga inbunruah chu a finthlak ber niin a lang.

Rooney-a'n rei tak chhung chu a buaina, harsatna leh manganna te sawi chhuak loin mahniin a tuar a, chu chuan khelmualah thinrimna a hring tel a, a hnathawhin a tuar a, lungngaihna mahnia up mai a ṭhat lohzia hrechiangtu a ni - tunah a sawi chhuak a, a hahdam ta.

Entawn tur
Rooney-a'n harsatna tam tak tawk mah se a tuar chhuak a, tunah chuan Derby enkawlin, mite tana entawn tur hnutchhiahtu a ni ta. Championship club tluchhe mek siamṭhat hna thawktu Rooney chuan, "Derby-a ka hna avang hian coach ṭha tak ka nih theih ka inring hial a, 100% in chu chu ka ring thlap.

"Premier League-ah kalin, top club pawh ka enkawl thei tawh hialin ka inhria. Ka theihna hi ka hrechiang em em a, a pawimawh berah chuan, ka chak lohna pawh ka hrechiang a ni," a ti a, hmanni lawka harsatnain a tlak buak mihring kha a inringtawk ta hle - khua a dur reng ngai lo.

Rooney chuan, "Steven Gerrard-a'n a coaching staff-te a chhawr ṭangkai dan, assistant coach Michael Beale a hman dante ka lo hria a, Stevie nen hian kan kalphung a inangin ka hria - tun hnaiah pawh kan inbia a, Villa nen inkhel turin kan inbe hman a, mahse, match kan neih avangin kan hman ta lo a ni," a ti a, England tana a khelhpui ṭhin nen an coaching style a inan thu a sawi.

A pawimawh ber chu Rooney hi a ṭawngṭai ṭhin - United legend chuan, "Sakhuana ngaihsak mi ka ni a, ka ṭawngṭai ṭhin. He thu ka sawi hian mi a ah min ngai mai thei a, mahse, kan hnena awm ve tawh lo ka pi leh ka nupui nau Rosie-te kha, kan bulah hian an awm ve reng hian ka hre ṭhin," a ti a, a thlarau mi riau!