Vawiin aṭangin IPL Mega Auction 2022

Indian Premier League 2022 puala player lilamna (auction) chu vawiin February 12, Inrinni leh February 13, Pathianni hian Bengaluru-ah neih a ni dawn. Lilamna hunah hian team 10-ten season thara an squad tur an thlang fel ang.

Kumin inelna hi TATA-in a sponsor dawn a, inelna hming pawh TATA IPL 2022 tih a ni ang. Auction hi chawhma dar 11:00-ah ṭan ve ve tur a ni a, Star Sports kaltlangin a en theih dawn a ni.

Team 10 chu
IPL-ah hian team riat an awm ṭhin a, chung team riatte chu Chennai Super Kings, Delhi Capitals, Kolkata Knight Riders, Mumbai Indians, Punjab Kings, Rajasthan Royals, Royal Challengers Bangalore leh Sunrisers Hyderabad te an ni.

Tun season aṭangin team riat ni ṭhin chu team 10-ah tih pun a ni. Team 10 an awm dawn tak avangin season khata match 60 awm ṭhin chu match 74-ah a pung chho dawn a, inkhelh dan kalphung erawh group stage leh playoff a la ni reng ang.

Club thar pahnih lilamna hi nikum October thla tawp khan neih a ni a, RPSG Group leh CVC Capital Partners ten team pakhat ve ve an chang a, Lucknow leh Ahmedabad-ah an innghat dawn. Team hming tur pawh tihfel tawh a ni a, Lucknow Super Giants leh Gujarat Titans hming an vuah.

Sum chungchang
IPL club-in player pali ṭheuh an chelh thei a, club thar pahnih Giants leh Titans hian team dang chelh bang aṭangin player pali an la thei bawk. Team tin hian player 18 aṭanga 25 inkar an nei tur an ni a, an hlawh tur pawh bituksak vek an ni.

Team pakhatin a tlem berah nuai 6,750 ($9m) aṭanga nuai 9,000 ($12m) an hmang thei. Delhi Capitals-in Rishabh Pant (16), Prithvi Shaw (7.5), Axar Patel (9) leh Anrich Nortje (6.5) te chelh nan nuai 4,250 an hman tawh avangin nuai 4,750 chauh hman tur an la nei tawh. Hetihlai hian Punjab King chuan Arshdeep Singh (12) leh Mayank Agarwal (4) te chauh an chelh avangin nuai 7,200 hman tur an la nei thung.

Team tinin pawisa hman theih zat inang an nei vek a, team ṭha din turin sum hman thiam a ṭul. Vawiin aṭanga neih tur IPL Mega Auction hian champion tur a hril thei hial ang.

Auction chu
Auction-ah hian player 590 thlan tur an awm dawn a, heng zinga 370 hi Indian niin 220 hi foreigner an ni thung. A tirah tak chuan player 1,214 an awm pha hial a, amaherawhchu team 10-te duh dan an thlir hnuin 590-ah tih hniam a ni.

IPL auction-ah hian player-te hi an theihna anga ṭhen hran an ni. Marquee player tih hmasak ber an ni a, a dawtah batters, allrounders, wicketkeeper-batters, fast bowlers, leh spin bowlers ten an zui ang a, a tawp berah ram tana la khel lo player an auction ang.

Kum 2022-a marquee player-te chu R. Ashwin, Trent Boult, Pat Cummins, Quinton de Kock, Shikhar Dhawan, Faf du Plessis, Shreyas Iyer, Kagiso Rabada, Mohammed Shami leh David Warner te an ni a, cricket khawvela langsar tak vek an ni.

Player hlutna a zirin lei theih ṭanna (base price) a inang lo. Player man tlawm ber chu nuai 20 aṭangin a inṭan a, a sang ber chu nuai 200 a ni thung. Marquee player 10-te hi nuai 200 aṭangin an man a inṭan vek. Nuai 200 man chin player hi 48 (17 Indian leh 31 foreign) an awm a, an lilam fuh dan a zirin nuai 200 aiin a sang chho daih thei dawn.

Player chelh zinga hlawh tam ber chu KL Rahul a ni a, India opener hian nuai 1,700 zet a hlawh. Auction hunah hian KL Rahul rawn tluk pha an awm ang em tih hriat a châkawm hle.

Lilamna hi British mi Hugh Edmeades-a'n a buaipui dawn a, ani hian kum 2018 khan Richard Madley a thlak. Edmeades hian khawvel pumpui huap auction 2,500 aia tam a buaipui tawh. Kum 2014 pawh khan Eric Clapton-a guitar 88 zet lilamin $7,438,624 a hmu chhuak a, Edmeades hian sulhnu a nei ṭha hle.