Foxes ngamtu Liverpool-in City um zel

Liverpool forward ṭhangduang Diogo Jota'n goal hnih a khung a, Ningani zan khan Reds hian Premier League-ah Leicester City chu 2-0 in an hneh - hmahruaitu City nena an inkar chu point kuain an sawr zim.

Africa Cup of Nations final-a an chak loh hnuin Mohamed Salah chuan Liverpool a zawm leh tawh a, Foxes lakah bul ṭan nghal lo mah se bench aṭanga luhtir a ni. Reds player thar Luis Díaz chuan a vawi khat nan bul a ṭan bawk.

AFCON khelh vanga Salah leh Sadio Mane an neih loh laia tlawm nei lo Liverpool hi inelna hrang hranga an match hnuhnung 19-ah vawi khat chiah an tlawm a, chu chu December 29-a Foxes an ngam loh kha a ni - phuba an la ta.

Reds hian Pathianni Zan dar 7:30-ah Premier League match an khel zui dawn a, relegation zone aṭanga talchhuah tum Burnley an hmachhawn dawn avangin a awlsam lo ang.

Liverpool an thiam
Jurgen Klopp-a'n AFCON champion Sadio Mane a la chhawr thei lo a, bench-ah Salah a awm bawk. Mahse, heti chung hian tlarhmaah Roberto Firmino, Jota leh Diaz an la inkawp thei a, an squad a chhah tih a lang.

Minute 34-naah Trent Alexander-Arnold-a corner aṭanga ball kal chu Virgil van Dijk-a'n goal zawnah a tauh a, Leicester keeper Kasper Schmeichel-a'n dang mah se a per lehlam hi Jota ke bulah tak a tla a, goal-ah a lo chantir.

Portuguese forward hian a duhtawk lo - minute 87-naa Joel Matip ball pek ṭha tak chu a khung leh bawk. Tun season inelna hrang hranga match 30 a khelh aṭanga goal 17 a khungna a ni a, assist vawi thum a nei tawh.

Salah vanneih zan ni se hattrick siam thei a ni - vawi khat woodwork a pet per a, hnai set sawt aṭanga a chance neih duhawm vawi hnih chu Schmeichel-a'n a dansak bawk. Foxes keeper a khel ṭha a, Salah bakah Firmino leh Diaz-te hun ṭha neih a dansak pawh ṭha tak a ni.

Champion beiseina
Liverpool-in hnehna an chan avangin point 12-a sang fal hman City an hnaih zel a, an inthlauhna point kua hi la tam angin lang mah se match khatin an khel tlem zawk a, Etihad Stadium-ah an la intawng dawn bawk.

Chumi awmzia chu Reds hi an khelh hmabakah chak se, City hneh bawk se, an inkar chu point thum chauh a ni tawh dawn tihna a ni - Klopp erawh a la ṭawng fimkhur rih hle. Liverpool coach chuan, "City kan chhaih buai phak em ka hre lo a, umphak theih erawh an nih ka ring tawh lo.

"Chuvanga inthlahdul thei erawh kan ni lo a, he club ropui tak tan hian chak kan tum zel tur a ni. Kan chak hi a pawimawh a, mahse, City um phak ai chuan kan hnuaiah min umphak tum an awm ve reng tih kan hriat tel a ṭul a ni," a ti.

Hetihlai hian Thiago Alcantara ngaihdan a dang a, Spanish midfielder chuan, "Nomawi chawi thei kan la ni. Match khatin kan khel tlem a, City kan la tum dawn bawk," tiin beiseina a la nei - Reds hian League Cup final an lut tawh a, FA Cup leh Champions League-ah an la dam bawk a, nomawi beisei tur an la ngah hle.