Catalan derby: Espanyol khelmualah Barcelona

Barcelona-in an league match hnuhnung berah an hmelma langsar Atletico Madrid chu 4-2 in an hneh a, Xavi enkawl Catalan club phur vanglai tak a ni.

La Liga table-a palina ni mek Barcelona hian Pathianni zan dar 1:30-ah Catalan derby an hmachhawn zui dawn a, Espanyol khelmualah an leng dawn.

Catalan club tan hian league champion nih chu thil beiseiawm ni tawh lo mah se Champions League khelh tum boruak a sang a, season tharah Europe-a inlan an duh chuan an tan tlawm a thiang lo.

League hmahruaitu Real Madrid chu zanin dar 8:45-ah Villarreal khelmualah an leng dawn a, zanin dar 1:30-ah Atletico Madrid chuan Getafe an mikhual bawk ang.

Beiseina thar
Spanish media-ten an tarlan danin Xavi-a'n thlasik transfer-a a player lakluhte hmangin La Liga-ah sulhnu ropui hnutchhiah a tum a, Espanyol lakah pawh Pierre-Emerick Aubameyang, Ferran Torres leh Adama Traore chu tlarhma pathuma hman a tum nia sawi a ni.

Xavi ruahmannaah Torres-a'n centre forward hmun pawimawh a chan chhunzawm zel a rinawm a, Atletico lakah khan Manchester City forward hlui hi Traore nen chuan bul an lo ṭan tawh.

Kha inkhela bench aṭanga luhtir Aubameyang-a'n a rawn belh dawn tihna a ni a, Espanyol tan hmachhawn an châkawm lo ang. Hetihlai hian Memphis Depay chu hliam vangin a inlan theih a rinawm loh a, contract thar ziak duh lo Ousmane Dembele pawh Xavi-a'n a chhawr châk tawh lo.

Ansu Fati pawh hliam vangin a la talbuai mek a, Luuk de Jong, Abde Ezzalzouli, Ferran Jutgla leh Gavi te duhthlan tur an la awm bawk - Xavi-a'n Pathianni zana team a rem dan tur hmuh a châkawm a, league match li a zawna chak zo tawh lo Espanyol laka an chak theih loh chuan zawhna tam tak a pian belh ang.

Benzema tel lohna
Real Madrid-in zaninah Villarreal an lenchilh dawn a, an thiampuipa Karim Benzema tel loa an inlan a ngaih a rinawm - French striker hi malpui hliam vangin a chawl mek a, karleha an inkhel tur ngaihtuah chungin an la chawlhtir a rinawm.

Spanish club hian karleh Thawhlehni zanah Champions League last 16 first leg khel turin Paris Saint-Germain an lenchilh dawn a, coach Carlo Ancelotti chuan he inkhel tur thlir chunga Benzema hahchawlhtir rih hi a duh nia sawi a ni.

Mahse, La Liga hmahruaitu Real hian pahnihna Sevilla aiin point ruk chauhin an hmu sang zawk a, parukna Villarreal hi Champions League khelh tum an nih bawk si avangin an fimkhur a ngai dawn.

Tun season-a goal 24 khung tawh Benzema awm loin Real tlarhma a hriam tawk ṭhin lo a, a hrilhfiahna ṭha ber chu Copa del Rey quarterfinal-a Athletic Bilbao an ngam loh kha a ni - zaninah Marco Asensio, Vinícius Júnior leh Isco ten mawhphurhna an lak thiam a ṭul ang.