Match hnihnaah Murray a tla

Chak ve zeuh ṭhin mah se a daih rei thei ta meuh lo. Andy Murray chu Rotterdam Open second round-ah a tla, a khingpui Felix Auger-Aliassime lakah straight set hmangin a tlawm.

Tun hnaiah Felix Auger-Aliassime hi a khel ṭha ṭhin viau, kum 21 mi hian Britain tlangval hi 6-3, 6-4 in a hneh. Australian Open khelh zawh takah khan quarterfinal a thleng tawh bawk a, tun ṭumah hian champion tura rinkai zingah a tel phak.

Kum 34 mi Murray hian set pahnihah a service a hloh ve ve, ama service ṭum pawhin point hmuh a harsat thei hle. Darkar khat leh minute 37 chhung lekin Canadian rawlthar zawkin hnehna a chang.

World number 9 Auger-Aliassime chuan, "Andy inkhel lai hi tun hmain ka lo en nasa tawh ṭhin hle, player ṭha tak a nih avangin kan inkhelh dawn pawh hian ngaihtuahna ka seng nasa. Fimkhur a ngaihzia ka hrechiang hle a ni.

"A vanglai a pel tawh a ni mai thei, chutih rualin a ball vuak lo dawnsawn kha a la harsa thei hle," tiin a khingpui a fak. Inkhel en erawh chuan kawng tinrengin Auger-Aliassime hi a chungnung zawk a, harsatna lian tham a tawk lo.

Grand Slam vawi thum champion tawh Murray-a'n nikum ang bawkin clay court season hman a tum lo. Inkhel loa a awm reng a nih chuan Wimledon khelh hunah ranking hniam tak aṭanga a inlan leh a ngai dawn.