Semifinal-ah Juve an lut

Juventus chuan Sassuolo 2-1 a hnehin Coppa Italia semifinal an lut, nipui bazara striker Dusan Vlahovic an chhuahsak tak Fiorentina nen final luh an inchuh leh ang - Serbia international hian inkhel boruak a siam dawn.

Ningani zan Juventus Stadium-a inkhelah Paulo Dybala hmangin Old Lady lamin hma an hruai, mikhual lamin Domenico Berardi leh defender Giorgos Kyriakopoulos ta hmanga hun ṭha an chhawr loh hnuah Hamed Traore hmangin an sut.

Team pahnih an in nawr tawn zak zak, remchang pawh an insiam thei ve ve - mahse goal erawh kan hmu thei mai lo. Hun tawp dawnah Vlahovic-a'n mual sir aṭangin box chhungah ball a luh pui a, a shot lo dang pertu Ruan Tressoldi chuan anmahni lamah ti lut palhin Turin club chakna goal a ni nghal.

Coppa Italia semifinal-ah Juventus hian Fiorentina an hmachhawn dawn a, semifinal lehlamah AC Milan leh Inter Milan an inkhel bawk ang; team ṭha pali an la nih avangin inelna boruak a sang zual zel ang.

Juve manager Max Allegri chuan, "Minute thumna lekah goal kan khung, a hnu lamah hniam deuh lai nei mah ila kan chesual nasa lo. Player tinin anmahni hna ṭheuh ṭha taka an thawh chuan a rah chhuah kan hmu ṭhin.

"Kan squad tichak zual turin Vlahovic leh Zakaria kan neih belh a, league leh cup inelna lamah hmun pawimawh an chang phak nghal a, danglamna nasa tak an siam thei hian min tilawm," tiin a sawi.

Serie A palina Juve hian Pathianni zan dar 1:15-ah league match an khel chhunzawm dawn. Palina nih tuma an elpui Atalanta nen an inkhelh dawn avangin match pawimawh a ni ang, team pahnih inthlauhna hi point hnih chauh a nih avangin an dinhmun tidanglam thei tur inkhel a ni ang.