Blasters ngamtu Jamshedpur dinhmun a ṭha
Indian Super League semifinal khel turin Jamshedpur chuan an dinhmun an sawhnghet zel. Ningani zan khan Kerala Blasters chu 3-0 in an hneh a, Hyderabad chiah phak loin table-ah pahnihna an ni mek - nizan inkhel result a zirin he thuziak i chhiar meuh chuan an dinhmun a danglam leh tawh ang.
Rangers forward hlui Greg Stewart chuan Jamshedpur tan goal hnih a khung a, a goal khung hi penalty aṭanga a chhuih luh ve ve a ni - league match 14-a goal sarih a khungna a ni a, assist vawi ruk a nei ta bawk.
JFC-in bul ṭan ṭha viau mah se goal khung theihna chance duhawm nei hmasa zawk chu Blasters an ni a, mahse, Jitendra Singh chuan chance a khawhral - Denechandram Meitei chuan Stewart a ti tlu zui a, penalty a chawi.
Scottish forward hian a penalty hlawhchhuah hi goal-ah a chantir a, goal dang awm loin chawlhlawk hman a ni. Second half-ah Blasters an insiamṭha lo - khelmual an lut leh ṭan chauh tihah Croatian centre back Marko Leskovic chuan Boris Singh a ti tlu a, penalty a chawi.
Greg Stewart bawkin penalty hi goal-ah a chantir a, Daniel Chukwu goal khung pawh Stewart hlawhchhuah bawk a ni - Steven Gerrard hnuaia Rangers-a khel tawh forward hiang rang takin freekick a pet a, he ball lo chang fuhtu Boris chuan Chukwu tan a siamsak zui a, Nigerian striker hian goal-ah a lo chantir.
Season hmasaa East Bengal tana beisei phak lo Chukwu hian tun season-ah league match 13 khelin goal nga a khung tling ta a, Jamshedpur tan nuam ti takin a khel mek.
Blasters tan Jeakson Singh chuan si phurh sutna remchang nei mah se goal-ah a chantir thei lo a, Men of Steel (Jamshedpur sawina) tan Ritwik Das leh Ishan Pandita ten hming chherna remchang an neih an chhawr lo bawk.
South Indian club tan ṭum dang ang bawkin K. Lalṭhathanga'n inkhel bul a ṭan a, Jamshedpur tan Laldinliana Renthlei leh Ricky Lallawmawma ten bul an ṭan bawk - tun season ISL match 14 an khelh tawhah bul an la ṭan dun vek!
Jamshedpur tan hian hun tawp hnaih lamah PC Laldinpuia chu luhtir a ni bawk a, ISL-a a season hmasa ber hmangtu Samthang tlangval tan ISL-a a match hmasa ber a ni.