Club World Cup champion Chelsea

Chelsea chuan an la champion ngai lohna Club World Cup nomawi chawi turin Inrinni zan khan Brazilian club Palmeiras 2-1 in an hneh. German manager Thomas Tuchel chuan an hlawhtlinna hi Roman Abramovich tan a hlan a, London club hian Russian billionaire hnuaiah hian nomawi chawi theih zawng zawng an chawi vek.

Mohammed Bin Zayed Stadium, Abu Dhabi-ah Chelsea-in Romelu Lukaku hmangin goal an khung hmasa a, Brazilian club Raphael Veiga penalty hmangin an sut. Minute 90 khelh zawhah chak zawk an awm lo a, Kai Havertz-a'n minute 117-naah penalty aṭangin chakna goal a khung.

Kum 37 mi Chelsea defender Thiago Silva chu best player atan thlan a ni a, Brazil international hi man of the match-ah thlan a ni bawk.

Tuchel-a hoin
Thomas Tuchel-a'n Covid-19 a kai avangin semifinal-ah Chelsea a ho thei lo a, final-ah erawh German manager hi mual sirah a rawn awm thei tawh thung. Palmeiras hmachhawn turin Edouard Mendy chu Kepa Arrizabalaga aiah dah luh a ni.

Blues-in an squad ṭhatna pholangin outfield player pathum an siksawi bawk. Defence laiah Antonio Rudiger, Thiago Silva leh Andreas Christensen te bawk an awm. Al Hilal an hneh ṭumin mual sir aṭanga Marcos Alonso goal nawr a na tawk lo a, vei lam kil aṭanga nawr turin Spanish wing back aiah English winger Callum Hudson-Odoi a rawn lut. Dinglamah tawnhriat nei ṭha César Azpilicueta a awm.

Defence thlawp turin Mateo Kovacic leh N'Golo Kante te an awm a, French midfielder hi Jorginho aiah a lut. Tlarhmaah Romelu Lukaku bawk a mal tlat a, Kai Havertz leh Mason Mount ten an thlawp. Mount hi Hakim Ziyech aia lut a ni.

A hmuhnawm
Chelsea assistant manager Zsolt Low sawi lawk ang ngeiin Palmeiras-in ṭantu an nei ṭha a, London club pawhin thlawptu an ngah. Entu mipui 32,871 an pungkhawm a, stadium khata mipui an awm avangin inkhel boruak a nung.

First half-ah team ṭha zawk tia chhal tur an awm lo a, chance ṭha a awm meuh lo. Minute 54-naah goal hmuh tur a awm chauh a, vei lam aṭanga Hudson-Odoi cross chu Lukaku-a'n a tauh goal ṭha hle.

Brazilian club-in minute 10 hnuah an sut. Blues veteran defender Silva-a'n ball tauh a tumna lamah ball-in a kut a per a, penalty a chawi. Palmeiras tan Raphael Veiga rawn pen chhuakin keeper Mendy a bum a, siphurh a sut.

Mount thlaktu Christian Pulisic-a'n box pawn aṭangin goal pawnah chiah a pet a, minute 90 chhungin goal dang a luh belh lo. Extra time-ah goal hmuh tur a awm lawk lo a, penalty shootout an hnaih hret hret.

Blues captain Azpilicueta ball pet chuan Palmeiras defender Luan Garcia kut a per a, European champion-in penalty an hmu. Champions League champion-na goal khungtu Havertz-a'n cool takin minute 117-naah chakna goal a khung.

Penalty chawitu Luan hian injury time-ah Havertz-a goal khung tur a tih tluk avangin hnawhchhuah a ni a, hun a tawp zui. Club World Cup-ah a vawi khat nan Chelsea an champion.

Abramovich a tan
Inkhelh banah Chelsea neitu Roman Abramovich leh manager Thomas Tuchel te an inhmu a, an inlawmpui tawn. German manager Tuchel chuan, "Ka lawmpui a che. I tan a ni, i club a ni a, i hnathawh a ni a, club i hmangaihna avanga tun hun hi thleng kan ni. Ka tel ve thei hi ka lawm takzet a ni," tiin club neitu Abramovich hnena a thusawi chu media hmaah a sawi chhawng.

Tuchel hian Covid-19 a kai a, UAE-a zin turin a negative phawt a ngai. German manager hian mual sira awm ngei a duh avangin a result a hriat hma hauhin airport a pan a, vanneihthlak takin a negative ta bawk.

Chelsea manager chuan, "Kan hun neih kha a ral mai dawn a, chance hnuhnung ber chu Inrinni zinga thlen a ni. A hma pawh khan airport ka pan lawk fo a, mahse, ka la positive avanga koh let pawh ka tawng ṭhin. A tawpah erawh ka vannei a, Zirtawpni zan zanriah kil thei turin ka thleng," tiin Abu Dhabi a pan dan chanchin a sawi.

FIFA Club World Cup - Thlirna Tawi
A hmun Abu Dhabi, UAE
A hun 3-12 February 2022
Champion Chelsea, England
Pahnihna Palmeiras, Brazil
Pathumna Al Ahly, Egypt
Palina Al Hilal, Saudi Arabia
Pangana Monterrey, Mexico
Parukna Al Jazira, UAE
Pasarihna AS Pirae, Tahiti
Golden Ball Thiago Silva, Chelsea
Silver Ball Dudu, Palmeiras
Bronze Ball Danilo, Palmeiras
Top Scorer Romelu Lukaku, Chelsea
(2 Goals) Raphel Veiga, Palmeiras
Yasser Ibrahim, Al Ahly
Abdoulay Diaby, Al Jazira
Final MoM Thiago Silva, Chelsea
Fair play award Chelsea, England

First Round - February 3, Ningani
Al Jazira 4–1 AS Pirae
ALJ : Zayed Al-Ameri 5'; Ahmed Al-Attas 25'; Milos Kosanovic 41'; Abdoulay Diaby 63'
ASP : M'hammed Rabii Rabii 48' (OG)

Second Round
February 5, Inrinni
Al Ahly 1 - 0 Monterrey
ALA : Mohamed Hany 53'

February 5, Pathianni
Al Hilal 6 - 1 Al Jazira
AlH : Odion Ighalo 36'; Matheus Pereira 40'; Mohamed Kanno 57'; Salem Al-Dawsari 77'; Moussa Marega 88'; Andre Carrillo 90+2' (pen.)
AlJ : Abdoulay Diaby 14'

Semifinal
February 8, Thawhlehni
Palmeiras 2 - 0 Al Ahly
PAL : Raphael Veiga 39'; Dudu 49'
February 9, Nilaini
Al Hilal 0 - 1 Chelsea
CHE : Romelu Lukaku 32'

5th Place - February 9, Nilaini
Monterrey 3 - 1 Al Jazira
MON : Sayed Sultan 4' (OG); Rogelio Funes Mori 11'; Cesar Montes 25'
ALJ : Bruno 90+1'

February 12, Inrinni
Third Place
Al Hilal 0 - 4 Al Ahly
ALA : Hamdi Fathi 8'; Yasser Ibrahim 17'; Ahmed Abdel Kader 40'; Amr El Solia 64'

Final
Palmeiras 1 - 2 Chelsea
PAL : Raphael Veiga 64' (P)
CHE : Romelu Lukaku 54'; Kai Havertz 117' (P)

Chelsea hlawhtlinna thuruk Azpilicueta
Chelsea hlawhtlinna turin club neitu Roman Abramovich a hnathawh a ropui a, hming langsar ṭhahnem tak an awm bawk. Amaherawhchu Cesar Azpilicueta hian a phu ang tawka fakna a dawng ṭhin lo a, tunah erawh Blues player zinga nomawi chawi theih zawng zawng chawi thei hmasa ber a nih avangin a chanchinin sawi zui a hlawh ta.

Azpilicueta hian kum 22 mi a nih laiin Marseille aṭangin kum 2012 khan pound maktaduai 6.5-in Chelsea hi a pan a, kum 10 hnuah a captain-na hnuaiah Blues hi FIFA Club World Cup-ah a champion pui. Kum 32 mi Azpilicueta hian Blues hi nomawi chawi theih zawng zawng Premier League (2), FA Cup (1), League Cup (1), Champions League (1), Europea League (2), UEFA Super Cup (1) leh FIFA Club World Cup (1) te a champion pui vek.

Spanish defender hi a hming lam a harsat avangin Chelsea ṭantute chuan 'Dave' tihin a hminglem an phuahsak a, Blues ṭantuten a chanchin hi chhuang takin an la sawi zel ang.