East Bengal legend Didika a chawl
Mizo football ngaina zingah a hming sawi nawn a ngai lo a, Kolkata khawpuia atchilh rawn a nihzia inhrilh nawn a ngai lo - a hming chu Lalrindika Ralte a ni a, East Bengal legend hian inkhelh a chawlhsan thu a puang ta.
Didika chuan, "A hmasa berin tun dinhmun min hruai thlengtu Pathian hnenah lawmthu ka sawi a, ka chhung te, ka ṭhian te, ka inkhelhpui te, Mizoram Football Association, Mizo Professional Footballers' Association leh ka inkhelh chhunga min duhsak a, min thlawp rengtu Mizoram mipuite chungah thinlung takin lawm thu ka sawi.
"Tunah chuan professional football ka lo chawlhsan dawn ta a, min duhsakna leh min hmangaihnate kei chuan ka rul seng lo, in zavai chungah ka lawm takzet zet e," tiin social media lamah a chawlh thu a puang.
India tana vawi 16 inlan hman Didika chuan, "Season hmasaa ka khelhna Real Kashmir pawhin kum hnih dang contract thar ziak turin min dawr a, he contract zawha chawlh chu ka tum dan a ni.
"Mahse, hri leng vangin mumal takin a inkhelh theih loh a, chhungte zingah hri kai an lo awm ve leh ṭhin bawk. League hmachhawn dawnin khung hran ṭhin kan ni bawk si a, chhungten harsatna tawk palh se, engmah ti thei loa awm theih a ni. Nupui fanaute ka lo nei tawh bawk nen, chawlh a hun ve taah ka ngai a ni," tiin Vanglaini a hrilh.
Didika hian kum 2004 khan GAIL MZP Cup a khel a, hetah hian IFA-CCC Football Academy aṭanga scout lo kalte chuan an academy-a awm turin an thlang. IFA Academy aṭanga a chhuah hnuah Churchill Brothers tan a khel a, Pailan Arrows, East Bengal, Mumbai City, ATK, NorthEast United leh Real Kashmir te tan a khel leh bawk.
East Bengal-a season hnih chhung captain ni thei Didika hian a career chhungin Durand Cup (1), Federation Cup (1), Calcutta Football League (3), IFA Shield (1), Indian Super League leh SAFF Championship-ah te champion nomawi a chawi.
Ball pet thiam bik avanga hriat hlawh Didika chuan, "Inkhelh chawlhsan mah ila football hi chu ka kalsan lawk thei dawn lo. Indian football-ah Manipur, Maharashtra leh West Bengal lamin coach an nei ṭha ṭhin.
"Mizoten footballer ṭha tak tak kan neih tawh rualin national level-a coach ni thei kan la nei tam lo a, hei hi min ti rual awttu a ni. ISL club leh academy te thlengin assistant coach ang pawhin awm ve nual thei ila, tih hi ka duhthusam a ni a, chuti lam chu keipawhin ka ngaihtuah a ni," tiin Vanglaini a hrilh a, Mizo coach ṭha an tam chuan Mizoram football-in hma a sawn lehzual a beisei thu a sawi.
Didika hi Asian football-ah pawh a mikhual lo - kum 2008-a India-in AFC Under-16 Championship an khelh khan player pawimawh a ni a, Son Heung-min-a telna South Korea laka 5-2 a an tlawm ṭumin goal hnih a khung.
AFC Cup 2013-ah khan East Bengal chu semifinal a hruai thleng a, he inelnaah hian goal li khungin, a hunlaia Indian player zinga AFC Cup-a goal khung hnem ber record Bhaichung Bhutia siam chu a nih rual.