Man City tan Sterling

Manchester City chuan Premeir League hmahruaina sawhnghet turin Inrinni zan khan Carrow Road an luhchhuah a, tla thei dinhmuna ding Norwich City chu 4-0 zetin an sawp.

Pep Guardiola hote tan hian Raheem Sterling-a'n hattrick a siam a, Phil Foden-a'n goal khat a khung ve bawk. Man City hian match 25 aṭangin point 63 an hmu a, anmahni hnaih bertu Liverpool aiin point 12-in an hmu tam zawk. Nizan khan Reds hian Burnley an tlawh a, hnehna an chan chuan Pep-a hote nena an kar zau tak hi an tizim hret thei ang.

Spanish manager Pep Guardiola chuan, "Inrintawkna a neih nan hattrick hi a pawimawh. Goal khatna kha goal ṭha a ni thlawt. Striker hi chuan inrintawkna neih nan goal an mamawh a, goal a khung hnu khan a goal bawh a na hle," tiin hattrick siamtu Sterling a fak.

Sterling hi nikum nipui bazarah chhuak tura sawi a ni a, August leh October thla chhung khan match 14-ah vawi ruk bul ṭanin goal khat chiah a khung. November aṭanga tun thlengin match 16 a khel a, match 13 bul ṭanin goal 11 a khung. English forward hi Guardiola hnuaiah player pawimawh a ni tih a chiang hle.