Chak dan thiam lo Manchester United
Manchester United chuan Inrinni zan khan Southampton an mikhual a, first half-ah inkhel thunun chungin 1-0 in hma hruai mah se a tawpah 1-1 in an inhnehtawk. Ralf Rangnick-a hote hian an match hnuhnung pathumah first half-ah 1-0 in hma an hruai vek a, second half-ah an goal neih an hum zo lo vek!
Premier League inkhel dangah Everton-in Leeds United 3-0 in an sawp a, Frank Lampard hnuaia Premier League-a an chakna hmasa ber a ni. Table chanve hnuai lama awm club Brentford leh Crystal Palace te goal awm loin an inhnehtawk a, relegation zone-a awm Watford-in an mualah Brighton & Hove Albion 2-0 in an hneh lo.
United an hmuhnawm
Man United-in beiseina sang tak nena an lakluh Jadon Sancho-a'n a theihna a pholang ṭan a, mual vei lamah a hmuhnawm. English winger hian minute sarih chhungin Cristiano Ronaldo ṭum hnih siamsak mah se Portuguese forward hian goal-ah a chantir thei lo ve ve.
Kar laihawla Tottenham Hotspur hnehtu Saints-in Man United tlarhnung an ti buai ve tho a, chutihrualin mualneitu lamin counter attack hmangin chance ṭha an insiam hnem. Sancho-a'n a khalh luh ṭhat vanga a chance ṭha insiam chu keeper Fraser Forster-a'n dansak mah se minute 21-naah Marcus Rashford-a siamsak chu goal ruakah a khung. Sancho leh Rashford te hnathawh ṭhat tluk zetin English forward ball petu Bruno Fernandes-a'n through ball a pe ṭha.
Man United hian first half tawp hma hretin Paul Pogba hmangin goal dang khung belhah an inngai a, amaherawhchu French midfielder ball petu Ronaldo a offside. Half time-ah 1-0 a ni.
Saints an inlar
Mikhual team-in first half tawp lam aṭangin David de Gea tan hna an siam ṭan a, minute 48-naah Che Adams hmangin siphurh an sut. Adams hian Mohamed Elyounoussi pass chu mual vei lam aṭangin goal kilah tak a khung a, goal ṭha ni mah se Luke Shaw position dik loh zarah a offside loh phah.
Saints-in loan hmanga Chelsea aṭanga an hawh Armando Broja a che ṭha a, kum 20 mi Albanian forward hian box pawn aṭang ṭha zetin pet mah se De Gea-a'n a dansak. Old Trafford-ah mikhual team an inthlahrung lo.
Chutihrualin Man United-in chak tumin goal chance an insiam ve reng a, keeper Forster khelh ṭhat ṭum an tawng. Saints keeper hian Ronaldo, Diogo Dalot leh Harry Maguire te goal khung tur a dang a, offside vangin Ronaldo goal khung pawm a ni lo bawk.
Man United manager Ralf Rangnick chuan, "Thil thleng ngai bawk a thleng ṭhin hi a pawi. First half-ah kan khel ṭha a, kan zir angin counter attack aṭanga kan goal bawh a na. Amaherawhchu darkar chanve chhung lek kan daih a, first half tawp lamah pawh kan khel ṭha tawh lo. Second half ṭantirh minute 20 chhung kan talbuai a, goal kan chhuah phah bawk," tiin a sawi.
Lampard a lawm
Everton-in match ruk chhung Premier League-a chak an neih loh hnuah Inrinni zan khan Leeds United 3-0 in an sawp. Frank Lampard-a hoten Newcastle United an hneh loh hnuah an insiam ṭha a, Goodsion Park-ah game nung tak khelin hnehna an chang.
Toffees tan hian Seamus Coleman leh Michael Keane ten first half-ah an khung a, second half-ah Richardlison-a ball pet ṭha zet chu Anthony Gordon-a'n dang perin goal kilah a lut. Gordon-a khung anga dah ni mah se Brazilian forward tih ṭhat zara lut a ni a, Everton-in chak an phu.
Chutihrualin Marcelo Bielsa hote an vanduai a, Rodrigo-a'n box pawn aṭangin ṭum hnih woodwork a pet per. Jack Harrison-a'n chance ṭha a hlah a, Daniel James-a'n a hun ṭha bawhpelh bawk. Leeds United hian February 20, Pathianni zanah Manchester United an mikhual dawn.