Chhetri goal 50-na a tawk lo

Sunil Chhetri-a'n Indian Super League-a goal 50 khung tling hmasa ber record siam mahse, Bengaluru FC chu Hyderabad FC lakah hnehna a chanpui zo lo a, 2-1 in an tlawm - semifinal khelh beiseina erawh a la thi lo.

Zirtawpni zan ISL inkhelah Hyderabad tan Javier Siverio leh Joao Victor ten minute 30 chhungin goal hnih an khung hman a, minute 87-naah Chhetri-a si phurh sutna goal-in awmzia a nei lo - match thum chhung a zawna an chak tawh record chu a tawp ta.

India captain Chhetri hian ISL-a goal 50 khung tling tur hian match 110 a mamawh a, assist vawi 10 a nei tel bawk - season ṭantir lamah beisei a phak loh avangin tun season-ah goal a khung tam tawk lo a, match 16-ah goal thum khungin assist vawi khat a nei.

Inrinni zan ISL inkhelah ATK Mohun Bagan chuan 3-1 in NorthEast United an hneh a, Khalid Jamil leh a naute hi match 10 chhung chu a zawnin an chak zo tawh lo!

Highlander tan Suhair Vadak-kepeedika chuan minute 17-na lekah goal hmahruai khung mah se Bagan-in goal thumin an chhanglet a, Joni Kauko, Liston Colaco leh Manvir Singh ten goal khat ṭheuh an khung.

Euro 2020-a Finland tana inlan Kauko tan a goal khung hi ISL-a a goal hmasa ber a ni a, league match 12 a khelhah assist vawi nga a nei tawh bawk.

Kum 23 mi Colaco-a'n fak a phu - tun season-a league match 14 a khelhah goal sarih a khung tling ta a, assist vawi hnih a nei bawk. India coach Igor Stimac tan en a nuam khawp ang.

Bagan-in hnehna an chan avangin table-ah pahnihnaah an invawrh chho a, league match ruk zet khelh tur an la neih bawk avangin an chesual thut a nih loh chuan semifinal khelhna chance a sang hle.