Bochum-in Bayern an barakhaih

Bundesliga kai thar VfL Bochum chuan Inrinni zan khan champion lai Bayern Munich chu 4-2 in an hneh a, Julian Nagelsmann-a hote an hawi hai hle. Bavarians hi tun season league match-ah vawi li an chak tawh lo a, match 12 khelh tur a la awm chungin season liam taa Hansi Flick-a hnuaia an chak loh zat nen a inang tawh.

Vonovia Ruhrstadion-ah Robert Lewandowski hmangin Bavarians-in khung hmasa mah se Bochum-in first half chhungin Christopher Antwi-Adjei (14'), Jurgen Locadia penalty (38'), Cristian Gamboa (40') leh Gerrit Holtmann (44') te hmangin an chhanglet. Bayern-in second half-ah na takin an nawr let a, Lewy-a'n minute 75-naah goal hnihna khung leh mah se goal dang a luh belh tawh lo.

Ulreich a dem theih lo
Bayern Munich-in inhliam vangin keeper Manuel Neuer an chhawr thei lo a, second keeper Sven Ulreich-a'n captain ai a rawn awh. Bochum hi Allianz Arena-ah 7-0 ngawtin an sawp tawh a, Bavarians-in goal li ngawt an chhuah avangin keeper mawhpuh mai theih a ni.

Amaherawhchu, Bochum goal li hi goal ṭha tak vek a ni a, keeper tan dan theih loh tluk vek a ni. Christopher Antwi-Adjei-a'n amah vengtu Niklas Sule bumin goal kilah a pet a, Jurgen Locadia penalty pet pawh Ulreich-a'n ring dik mah se a kil em avangin a dang thei lo.

Mual ding lamah Bochum-in passing mawi an lantir a, angle zim tak aṭangin goal kilah tak Cristian Gamboa-a'n kawh zetin a pet goal. Goal lina pawh goal kilah tho a lut a, dinglam aṭangin Gerrit Holtmann-a'n mawi zetin a hlai lut.

Lewy a class
Bayern chak loh zanah Lewandowksi-a'n a class sanzia a pholang tho a, goal hmahruai a khung turin a ke ran zia a pholang. Polish striker hian mawi zetin a 'bicycle kick' bawk a, goalline-ah an dang.

Lewy hian keeper chiah a hmachhawn ṭumah goal-ah a chantir thei lo mah se angle zim tak aṭangin mawi zetin a volley lut leh tho a, freekick aṭangin crossbar a pet per leh bawk. Bochum-in first half-ah goal li an khung theih avangin second half-ah 'bus an park' thei a, goal khung a harsa tawh.

Engtin zel?
Bayern Munich hi hliam vangin an buai a, Bochum laka an tlawm zawhah Champions League last 16-ah RB Salzburg an hmachhawn nghal dawn. February 16, Nilaini zanah Neuer a la dam hman dawn loh avangin Ulreich bawk rin a ṭul dawn a, tlarhnung siam ṭhat a ṭul bawk.

Season thara Borussia Dortmund zawm tur Niklas Sule-a'n en bik a hlawh dawn a, Nagelsmann-a'n Germany international defender hi a en kan a nih pawhin a mak lo ang. Chutihrualin tun dinhmunah erawh inhliam vangin Sule-a'n hmun pawimawh a chan a la ṭulah a ngaih theih thung.