Real chak zo lo; Atletico chak hram

La Liga hmahruaitu Real Madrid an chak zo lo a, Villarreal nen 0-0 in an inhnehtawk - rei tak Real tana a inlan loh hnuah Gareth Bale lo kir mah se goal a khung lo a, point khatah lungawi an zir.

Zirtawpni zan khan Real elpui ber Sevilla chuan 2-0 in Elche an hneh a, team pahnih inkarah point li chiah a awm ta - Real tan champion nomawi chu thil chiangsa a sawi theih a ni lo.

Champions League khelh tum Atletico Madrid chu Inrinni zanah an inlan ve bawk a, Diego Simeone naute hian a thiam pali zinga tel an la phu tih pholangin Getafe chu 4-3 in an hneh.

Barcelona chuan nizan khan Catalan derby khelin Espanyol an lenchilh bawk a, he thu buatsaih a nih lai hian result kan hre hman lo.

Bale a nil
August 28, 2021-a Real Betis 1-0 a an hneh hnuah khan Real tan Gareth Bale a inlan leh tawh lo a, Inrinni zanah kum 32 mi forward hian Madrid khaw club tan bul a rawn ṭan - a vanneih zan ni se goal khung thei a ni.

Bale hian second half ṭantir lamah crossbar a tih per a, Villarreal goalkeeper Geronimo Rulli chuan vawi hnih zet a chance neih duhawm chu a dansak bawk - Rulli khelh ṭhat zan nen an intawng a, Bale a vannei tawk lo.

Villarreal tan Arnaut Danjuma chuan first half-ah chance nei mah se post a tih per ve bawk a, a vannei bik lo. Minute 74-naa Bale thlaktu Luka Jovic pawhin Real tan chakna goal khungna hun ṭha a nei a, mahse, Serbian striker hian bar a tih per ve bawk.

Real Madrid tan striker chhuanvawr Karim Benzema chuan dam lam pan tawh mah se bench-ah pawh hmuh tur a awm lo a, coach Carlo Ancelotti-a'n Thawhlehni zana Paris Saint-Germain nena Champions League last 16 first leg an khelh tur a ngaihtuah niin a lang.

Sevilla tan beiseina
Real Madrid ban hnu Julen Lopetegui-a'n a club hlui lehpela champion ngei a duh a, Zirtawpni zan khan Sevilla chu Elche lakah 2-0 in hnehna a chanpui leh ta.

League match thum zet a zawna draw result nei tawh Sevilla-in an mikhual Elche lakah goal an khung lawk thei lo a, point khatah lungawi an zir leh mai a ṭul dawn niin a lang hman.

Mahse, minute 70-naah Papu Gomez chuan Elche defender pathum a bum hnuah goal a khung a, kum 33 mi Argentine midfielder hian World Cup-a Argentina tana inlan a phuzia a pholang zel.

Sevilla-in an duhtawk mai lo. Minute nga hnuah Manchester United aṭanga loan hmanga an hawh Anthony Martial chuan Rafa Mir tan a siamsak a, Spanish striker hian chak nemngheh nan a khung.

Inkhel hmuhnawm
Atletico tan champion beisei chi ni tawh lo mah se Champions League tal khelh a ṭul a, 4-3 a Getafe hnehin top four-ah an la inhamtang hram - nizana Barca result a zirin an dinhmun erawh danglam thei a ni a, he thuziak i chhiar meuh chuan top four pawnah an awm tawh hial mai thei.

Diego Simeone-a naute tan Angel Correa leh Matheus Cunha ten minute 27-a tlin meuh chuan goal hnih an khung der tawh a, 2-0 a ni. Mahse, Getafe hian minute 45 a tlin hmain 3-2 in an lehthal hman!

Getafe tan Borja Mayoral chuan minute 30-naah si phurh a rawn sut ṭhen a, Stefan Savic leh Tomas Lemar handball vanga Atletico penalty chawi pahnih chu Enes Unal chuan goal-ah a chantir ve ve bawk a, 3-2 a ni der.

Mahse, Atletico-in tlawm an tum lo. Penalty chawitu Lemar-a'n a tihsual thup nan Correa tan a siamsak a,Argentine forward hian first half hun pek belhah si phurh a sut zo - minute 58-naah Atletico defender Felipe chu hnawhchhuah zui ni mah se Atletico an beidawng duh lo a, Mario Hermoso chuan minute 89-naah chakna goal a rawn khung a, Atletico an chak.