PSG mamawh chhanna Mbappe

Hun tawp hma chiaha Kylian Mbappe goal hmangin Paris St-Germain chuan Rennes 1-0 in an hneh hram. Paris club hian Ligue 1 table-ah point 16 zetin hma an hruai fal ta a, khelh hmabak la ngah deuh mah se an champion chiang tawha ngaih theih a ni.

Zirtawpni zan Le Parc des Princes-a inkhelah Mauricio Pochettino-a nauten goal khung an harsat, ball chang tamin hun ṭha insiam nual mah se a hmawr an bawk fuh thei lo - point khatah an lungawi mai a ngai dawn niin a lang hman.

Mahse, minute 90+3-ah Lionel Messi chuan mual sira awm Mbappe a hmu fuh a, ball ṭha takin a pe. France international hian rang zeta a insiamrempui hnuah goal kilah a khung a, point thum hmuh nan a tawk.

Paris club hian Thawhlehni zanah Real Madrid an hmachhawn leh dawn. Poch-a'n Spanish club ṭha an hmachhawn tur a hre reng a, forward Neymar-a'n training zawm tawh mah se league lamah a la chhawr lo.

PSG coach Pochettino chuan, "Inkhel harsa tak a ni, hetiang inkhela hnehna chan chu a hlu bik. Rennes hi team ṭha an ni a, mahni inveng thiam leh tih tur chin hre tak an ni," tiin an khingpui a fak a, harsa taka hnehna chanpuitu a naute a chhuan thu a sawi tel bawk.