Rangers-ah Ramsey a hlim

Aaron Ramsey chuan a club thar Rangers chu nuam a tih thu a sawi. Inrinni zan khan Scottish Cup last 16-ah bul a ṭan a, a club thar tana bul a ṭanna hmasa berah Annan Athletic chu 3-0 in an hneh.

Juventus aṭanga loan hmanga Rangers zawmtu Ramsey chuan, "A tira ka sawi lawk tawh ang khan Rangers inkhel boruak hi chu a nung thei hle. Fans ruh leh thawm ṭha tak hmaa inkhelh hi chu a nuam ṭhin takzet.

"Hun rei tak hnuah inkhel bul ṭantu ka ni ve leh thei ta a, rilru pawh a kal thui duh viau. Min ring ngamtu coach hnuaia inkhelh chu a nuam, inrintawkna pawh ka nei let leh thuai ang," a ti.

Wales midfielder Ramsey hian Arsenal aṭangin Old Lady a pan a, mahse Italian club tan hian beisei a phak lo. Inkhelh tam a duh avangin Scottish club a zawm, a loan hun a zawh hunah pawh Turin lamah a kir a rinawm tawh lo.