Napoli leh Inter Milan inhnehtawk

Inrinni zan Serie A inkhelah table hmahruaitu Inter Milan leh Napoli te 1-1 in an inhnehtawk a, a sang pahnihin point an hloh ve ve hi pathumna AC Milan tan chuan result duhthusam a ni ngei ang.

Diego Armando Maradona Stadium-a inkhelah Napoli lamin minute sarihna lekah goal an khung. Captain Lorenzo Insigne-a'n season kal laia a vawi ruk nan penalty a chhuih lut a, a team hma a hruaipui.

A tir lamah Napoli an khel ṭha, midfielder Piotr Zielinski chuan goal ban a tih per. Amaherawhchu, penalty bak chu an khung thei bik lo - second half tirah Inter lamin Edin Dzeko hmangin an sut a, goal dang a lut tawh lo.

Inter goalkeeper Samir Handanovic a khel ṭha, bench aṭanga lut Elif Elmas khung tur ṭha zetin a dansak a, khualmuala point an hlawhchhuah theihna chhan lian tak a ni.

Napoli captain Insigne-a'n Serie A season kal laiah goal ruk a khung tawh, a goal te hi penalty aṭanga khung vek an ni. Italy international hian Naples club tan goal 116 a khung ta a, legend Diego Maradona (115 goals) a khum ta chiah.

Dries Mertens (144 goals) leh Marek Hamsik (121) te erawh Insigne hian Napoli tana goal khung hnem lamah a la phak lo, season tharah a chhuah dawn avangin club tana goal khung hnem ber chu a ni dawn lo niin a lang.

Napoli coach Luciano Spalletti chuan, "Kan team khelh dan phung anga nuamti taka kan khelh hian result ṭha kan nei ṭhin, tun ṭumah pawh khan a tir lamah chutiang chu kan hmu. Mahse, Inter lamin min nawr buai tak hnuah kan vawng thei lo a, goal kan chhuah phah," a ti.

Inter Milan hi an coach Simone Inzaghi-a'n a hmunah a ho thei lo. Milan Derby-a an chak loh ṭumin referee Marco Guida lakah a che mawi lo a, match khat atan hrem a ni. Assistant manager Massimiliano Farris chuan, "Second half-ah kan theihna tak a lang.

"Mahse, a bul kan ṭan fuh lo kha a pawi. Napoli khan khelh dan phung nghet tak an nei a, an insiamrem zung zung zel avangin kan tan a awlsam lo. Coppa Italia kan khelh avangin kan chau tih a lang bawk," tiin a sawi.

Italy - Serie A
February 12, Inrinnni
Lazio 3 - 0 Bologna
Napoli 1 - 1 Inter Milan
Torino 1 - 2 Venezia