Serie A hmahruaitu AC Milan
AC Milan chuan Inter Milan nek chhuakin Serie A table chung berah an awm ta. Mahse, Milan hmahruaina hi 'mahse' in a zui a la ngai. Inter aia an sanna hi point khat a ni a, khelh zat inangah pahnihna la ni leh thei an ni - tuna an dinhmun erawh lawmna tur a ni thung.
Pathianni zan Serie A inkhel dangah Juventus chu an elpui Atalanta nen 1-1 in an inhnehtawk a, season thara Champions League khelh beisei AS Roma pawh Sassuolo nen goal hnih ve ve khungin point an insem ve bawk.
A chungah Milan
AC Milan hian an mikhual Sampdoria 1-0 in an hneh a, goal awmchhun hi Rafael Leao-a'n minute riatna leka angle zim tak aṭanga a khung a ni - Portugal forward hian season kal laiah goal 10 a khung tling ta chiah.
San Siro-a inkhel an ni bawk a, Milan an nghet ṭha - goal khung belh theihna remchang pawh an insiam nual. Mahse, Sampdoria keeper Wladimiro Falcone a chesual duh tlat lo a, goal khatah an lungawi a ṭul.
Milan manager Stefano Pioli chuan, "Milan nihna kha kan nei let leh ta. Khelmual chhunga lut chu tu pawh ni se, eng ang player pawh ni se Milan aiawh a ni tih a inhriat chuan theihtawp a chhuah a, a khel chhe ngai lo," tiin a sawi.
Season hmasa khan Milan hian champion an beisei ngam a, mahse season chawhnu lama an zuih avangin Inter Milan an phak lohna chu point 12 lai a ni. Kuminah erawh an daih rei phian a, league match hnuhnung thlengin an in um zui dawn niin a lang.
Juve an chelh
Juventus hi manager Massimiliano Allegri-a'n an beisei angin a kaihruai thei rih lo chu a ni. Italian manager hian ropui taka a lo enkawl tawh Old Lady hi palina nih phak pui tumin an bei mek - an player neih dan chhut chuan an ropui lo.
Atalanta tana Ruslan Malinovsky goal khung chu mikhual lamin hun tawp dawnah Danilo hmangin an sut hram a, mualneitu Atalanta lamin point thum an hmuh tur zinga point hnih an hloh ṭhen tia sawi theih a ni.
Juve manager Allegri chuan, "Harsa vak loa ven theih nia langah goal kan chhuah a, a hnu lamah ṭha takin khel mah ila a hmawr kan bawk fuh thei si lo. Point khat kan hlawh chhuak hi a lawmawm, chutih rualin hun ṭha kan hlohte kha a uiawm," tiin a sawi.
Atalanta manager Gian Piero Gasperini erawhin a naute khelh dan a fak thung, a zawna season hnih chhung Serie A goal khung hnem ber team hian kuminah chuan Milan club pahnih bakah Lazio an tluk lo a, an tlarhma lam an hriam zual leh deuh a ngai dawn.
Roma chak zo lo
"Inkhelh ṭan tirah khan inhnehtawk i duh em? tiin min zawt se la chuan ka duh lo ang. Mahse, a tawp lamah meuh kha chuan point kan hmu kha ka lawm," tiin Jose Mourinho chuan a sawi a, a naute khelh danah a lungawi lo.
Roma hian Tammy Abraham-a penalty hmangin hma an hruai hmasa, defender Chris Smalling-a'n anmahni lama a tih luh bakah mualneitu Sassuolo tan Hamed Traore chuan an hmahruaina a khung - hun tawp hma deuhin Bryan Cristante chuan Roma point hmuhna a tauh lut hram.
Mourinho chuan, "Kan duh ang result chu a ni lo, mahse eng nge kan beisei theih chuan ang. Chak lo ni ila chuan point kan hmu dawn lo tihna a ni a, point khat lekah pawh lungawi kan zir a ngai.
"Serie A match kan khelh hnuhnung paliah tlawm kan nei lo hi lawmna tur a ni a, chutihrualin chak dan pawh kan thiam tel a ngai, hmasawnna chu a indawta thleng tur a ni," tiin a sawi a, season tawpa an awmna tur chu sawi lawk theih a ni lo tih a sawi bawk.