Barca chak a kaltluang thei lo!

Barcelona-in January transfer inhawn laiin Ferran Torres, Adama Traore leh Pierre-Emerick Aubameyang te an lalut a, club president Joan Laporta phei chuan kan hriat ṭhin Barca kha an lo kir leh tak thu a sawi hial.

February a her chhuah meuh chuan transfer-a Barca chet nat hi a lang chhuak nghal niin a lang a, team ṭha Atletico Madrid lakah game mawi bik khelin, 4-2 in hnehna an chang. Barca fans an phur a, beiseina sang tak nen an inkhel leh tur an thlir.

Mahse, Pathianni zan khan Catalan derby-ah Espanyol nen 2-2 in an inhnehtawk. Barca hian Pedri hmangin goal hmahruai khung mah se Espanyol tan Sergi Darder leh Raul Tomas ten an chhanglet a, hun pek belh minute ruknaa Luuk de Jong-a goal khungin Barca a chhanhim.

Catalan derby boruak a 'hot' a, goal li ngawt a luh bakah red card pathum phawrh a ni bawk - Barca chak zo lo mah se table-ah palina an ni a, pangana Atletico Madrid nen an point hmuh zat a inang thung.

Inkhel hmuhnawm
Xavi hnuaia hmasawn Barcelona-in Catalan derby-ah goal an khung hma a, minute hnihna lekah Jordi Alba siamsak chu Pedri chuan goal hmahruai atan a khung nghal - Barca fans an phur hle.

Mahse, 2008-09 season hnua Barca laka la chak ngai lo Espanyol-in chak an tum ngam a, an hnual phah lo. Minute 40-naah Sergi Darder chuan si phurh sutna goal a khung a, goal dang lut loin chawlhlawk hman a ni.

Espanyol-in mualneitu an ni tih an inhria a, duhtawk an tum lo - Raul de Tomas chuan Darder-a ball pek chu a awma la thlain, mawi zetin a pet goal a, Marc-Andre ter Stegen tan dan theih a ni lo.

Barca an hawihai a, si phurh an sut thei lo - Espanyol an chak mai dawn niin a lang hman a, minute 90 a nih thlengin Barca hian a chhanletna tur an nei lo a, Xavi leh a naute an hlauthawng.

Buaina kara chhandamtu
Hun pek belh minute hnihna a ni a, Nico Melamed chu Gerard Pique lakah a foul a, buaina a chhuak zui - Melamed hi a tirah yellow card pek ni mah se buainaa a chet dan avangin a yellow card pahnihna pek a ni a, hnawhchhuah a ni.

Pique a him bik lo. Spanish defender hi a yellow card pahnihna pek a ni a, hnawhchhuah a ni ve bawk - goal mamawh Barca an tlem sawt a, an vanneihna erawh thil thleng vangin referee-in hun a pawtrei hret.

Hun pek belh minute ruknaah Traore chuan Barca tan match hnih a khelha a assist vawi hnihna ni turin ball a thlawh lut a, Luuk de Jong chuan Barca tana khel tlak a ni tih pholangin ṭha zetin a tauh lut.

Kut ruaka haw tur Barca-in beisei tawh loh hnuah point an hlawh chhuak a, hlim takin an haw. Minute 62-naa luhtir, hliam vanga lakchhuah ngai zui Manu Morlanes chu khelmual pawnah a lo insum lo deuh a, hun tawp hnuah red card pek a ni ve bawk.