Thluak 'game' hmangtu Azpi

Chelsea captain Cesar Azpilicueta chuan Club World Cup final-a Palmeiras nen an inkhelh ṭumin thluak game a hman thu a sawi a, hei hi extra time-a Kai Havertz-a penalty pet dawna thil thleng a ni.

Blues leh South American champion Palmeiras hi hun pangngaiah 1-1 in an inhnehtawk a, extra time khelh a ni - minute 117-naah Chelsea-in penalty an hlawh chhuak a, Kai Havertz chu a pettu tur a ni.

Mahse, German forward hma hian Azpi chuan pet tur awm takin ball a lo la a, a hnuah Havertz hi a pe. Azpi chuan, "Tactic a ni ber mai. Palmeiras player-te khan penalty pettu tur an rawn pan dawn tih ka hria a, chuvang chuan pet tur awm takin ka lo awm.

"Kai khan penalty chu a chanvo a ni tih a hre sa a, pressure a neih loh nan tikhan ka lo che a ni ber. Hun pawimawh a ni a, Kai hi khawvela penalty pet thiam ber pawl a ni bawk. Palmeiras player-te sawi zawng zawng ka ngaithla vek a, ka ngaihdanah chuan ka ruahmanna a hlawhtlingin ka hria," a ti a, Blues hi 2-1 in an chak.

Chelsea-in United Arab Emirates-a Club World Cup nomawi an chawi khan Azpilicueta hi Chelsea player zinga major tournament-a champion kim hmasa ber a ni a, CWC hmain Premier League (2), Champions League (1), Europa League (2), FA Cup (1), EFL Cup (1) leh European Super Cup (1) ah te champion nomawi a lo chawi tawh a ni.

Kum 32 mi defender chuan, "Kum 2012-a he club ka zawm khan ka zinkawng zawh tur hi ka hrethiam lo. Chelsea captain nih a, khelmual chhung leh pawna he club kaihruai thei nih hi nuam ka ti hle.

"CWC-a Chelsea kan champion vawi khatna a nih avangin a hlu ka ti a, club leh club neitute pawhin he nomawi chawi hi an phu a, kan champion thei hi ka inchhuang hle a ni," tiin a sawi.