Real Madrid hmaah Paris Saint-Germain

Zanin dar 1:30 hian Champions League last 16 khelh ṭan a ni dawn a, champion ngun ber Real Madrid-in Parc des Princes-ah sum hmang tam Paris Saint-Germain an hmachhawn dawn. Premier League champion Manchester City-in khualmualah Sporting Lisbon an hmachhawn bawk ang.

PSG-in European champion nih duhin Barcelona aṭangin Lionel Messi leh Real Madrid aṭangin Sergio Ramos an lalut a, UCL tawnhriat nei ṭha pahnih avangin zanin inkhel hi en a châkawm. Chutihrualin Los Blancos-in nipui bazarah Kylian Mbappe an lalut dawn niin sawi a awm bawk.

Club lian vs Club lian
PSG-in UCL nomawi la chawi lo mah se tun hnaia an record leh an player lakluh dan aṭangin club liana chhal theih an ni. French club hian season liam ta khan semifinal an lut a, a hma kumah final an lut.

Tun season-ah Messi leh Ramos bakah Georginio Wijnaldum, Achraf Hakimi, Gianluigi Donnarumma leh Nuno Mendes te an lalut a, PSG hian Neymar leh Mbappe te an neih sa bawk avangin anni aia ṭha an awm chuang lo.

Messi hian Ligue 1-ah goal hnih chauh a khung avangin an sawisel a, amaherawhchu Champions League-ah chuan match ngaah goal nga a khung. La Liga lamah Argentine forward hian Real Madrid lamah goal a khung fo tawh a, Carlo Ancelotti hoten an ven uluk a ṭul dawn.

Chutihrualin Real nena sawizawm Mbappe hi PSG innghahna a ni a, tun season-ah goal 20 khung tawhin heng zinga goal li hi UCL-a a khung a ni. French club hian an match hnuhnung berah Rennes 1-0 in an hneh hram a, goal awmchhun hi Messi siamsak Mbappe-a'n a khung.

Real Madrid hian Champions League nomawi vawi 13 zet an chawi tawh a, an chungnung fal. Ancelotti hote hi La Liga-ah hmahruaitu an ni mek a, Cristiano Ronaldo awm tawh lo mah se team ṭha an la ni.

Engtin zel?
Real leh PSG inkhel tur hi en a châkawm a, chutihrualin 'tie draw' pawh sual vanga intawng an ni tih erawh hriat a ṭha. French club hi a tirah chuan Manchester United nen pawh fuh an ni a, Mauricio Pochettino hote hi vanduai an inti ngei ang.

Chutihrualin Real Madrid an la vanduai zawk. Benfica nena inhmachhawn tura pawh vek tawh kha team ṭha ber zinga mi PSG nen an inkhel dawn. Spanish club tan lawmna tur erawh PSG tan Neymar a tel thei a nih pawhin bench-ah bak a awm lo ang.

Mahse, Real Madrid-in an goal khung khawl Karim Benzema an chhawr theih bik a rinawm loh. Chutihrualin tlarhamah Marco Asensio, Gareth Bale leh Vinicius te an la dah thei a, French club tan an la khauh viau ang.

City tan a awlsam?
Manchester City-in Premier League an thunun a, February thla ral hmain champion rim a nam der tawh. Champions League lamah pawh Pep Guardiola hote hian quatertfinal lut turin harsatna hranpa an tawh a rinawm lo a, a chhan chu last 16-a tum châkawm ber zinga mi Sporting Lisbon an hmachhawn dawn.

Zanin inkhelhna tur hi Sporting khelmual Estadio Jose Alvalade a ni a, English champion hian hnehna an chang a nih phei chuan nuam sa takin second leg an khel thei ang.

Hriat tel atana ṭha erawh tun season aṭangin away goal rule a awm dawn lo a, Man City hian khualmuala goal khung ṭeuh pawh ni se goal hlutna bak hamṭhatna a awm tawh lo ang.