Newcastle chhandamtu Kieran Trippier
Premier League mawngphah lama talbuai tak Newcastle United chuan chhandamtu thar an nei, a hming chu Kieran Trippier a ni. English defender hian Aston Villa lakah freekick mawi taka chhuih lutin Magpies hi 1-0 in hnehna a chanpui.
Pathianni zan inkhel dangah Tottenham Hotspur an mualpho. Spurs hi anmahni ang bawka European football khelh beiseitu Wolverhampton Wanderers lakah 2-0 in an tlawm, an tan Champions League khelh a awlsam dawn lo.
Hei le Trippier
Saudi Arabia sumdawng hausa kuta an luh khan Newcastle hi sum hmang pawp pawp tura ngaihna a awm hman. Mahse, manager langsar an la lo a, thlasik bazara an player lei pawh hming hrawl leh lian tak tak an ni lem lo.
Amaherawhchu, manager Eddie Howe-a'n an mamawh tak Trippier a lalut. Spurs defender hlui hian Everton an hneh ṭumin freekick a pet lut a, a match zawnin freekick a chhuih lut ta - tunah chuan tla thei china awm Norwich aiin point liin an sang; match khatin an khel tlem zui.
Magpies tan thu lawmawm lo pakhat a awm. Trippier bakah hian amah anga January thlaa an lak ve tho Javi Manquillo chu hliam vanga thlak an ngai, eng ang taka na nge an nih erawh hriat a la ni lo.
Newcastle manager Eddie Howe chuan, "Trippier kha a kephah chunglam a na, a inkhel zui thei lo. Damdawi inah X-ray a ni dawn, chumi hnuah a dinhmun tak a hriat theih ang," a ti. Howe hian tun hnaia a naute khelh dan chu lungawi thlak a tih thu a sawi bawk.
Spurs an mualpho
Antonio Conte-a'n team hrang hrang a lo enkawl tawh ṭhin. League bikah a zawna vawi thum a chak lohna aṭanga chhutin kum 12 a liam tawh, tunah chuan a record ṭha lo tak hi a nihrual leh ta chiah - Spurs hian tun hnaiah Chelsea, Southampton leh Wolves te an ngam lo.
Wolves tan Raul Jimenez (6') leh Leander Dendoncker (18') ten hma takah goal an khung a, striker ṭha Harry Kane leh Son Heung-min hoa khel North London club lamin an chhanglet thei lo, point 36 chauh la neiin pariatnaah an awm.
Spurs manager Conte chuan, "Mahni khelmualah ngei kan elpui kan hneh lo a nih chuan in enfiah kan ngai hle. Tuna kan khelh dan ang hi chuan season thara Champions League khelh a beisei ngam loh, thil theih a ni lo ang.
"Min ṭantute tan pawh kan result hi a lawmawm lo ang, khelmualah theihtawp chhuahin kan bei tur a ni a, chak duhin kan tuihal tur a ni. Fans lamin dawhthei takin min nghah a ngai dawn niin a lang, thawhhona ṭha nen kan tho leh thei ang," a ti.
Palina Hammers
Inkhel tur player an puan chhuah zingah Kurt Zouma a tel a, thil mak a ni lo. Khelmual pawn lama buaina nei defender hi West Ham manager Daivid Moyes-a'n a chhawr tur thu hi a sawi lawk sa vek a ni.
Mahse, warm-up neihnaah Zouma hi a nuamsam lo a, chawpchilh takin amah aia lut tur an thlan a ngaih phah. Zouma tel lohna Hammers tlarhnung a phui lo a, an khingpui Leicester City lamin Youri Tielemans leh Ricardo Pereira te hmangin goal an khung.
Hammers tan season duhawm hmangtu Jarrod Bowen-a'n goal khat a khung bakah, hun tawp dawna Craig Dawson khung tur a siamsak bawk. Moyes-a naute hian point 41 hmuin table-ah palina dinhmun an luah.
London club midfielder pawimawh Declan Rice chuan, "Hun tawp dawna goal khung hi chu a pawimawh bik, sang tak kan thleng thei a ni tih kan ring tlat tur a ni, beiseina kan neih miau chuan kan thleng thei ang," tiin a sang pali zinga tel theih a inbeisei.