Tsitsipas hnehin Auger-Aliassime a champion

Rawlthar beiseiawm Felix Auger-Aliassime chuan a vawi khat nan nomawi a chawi ta. Canadian player hian Stefanos Tsitsipas 6-4, 6-2 a hnehin Rotterdam Open-ah a champion.

Auger-Aliassime hian game hmasa berah world number 4 Tsitsipas service hi a chhuhsak nghal a, set hnih an khelh chhungin harsatna lian tham a tawk lo - darkar khat leh minute 18 chhungin hnehna a chang.

Kum 21 mi Auger-Aliassime chuan, "Tennis ka khelh hun chhunga ka hun tawn hlimawm ber a ni, tun ang hun ṭha hi tawng leh fo ila tih hi ka duhthusam a ni, a hmasa ber hi a tawpna ni lo hram rawh se," a ti.

Australian Open-ah khan Auger-Aliassime hian beisei phak baka ṭhain a khel, quarterfinal-a Daniil Medvedev nen set nga an khelh ṭumin a theihna sang tak a lantir tawh a, tun dinhmunah world number 9 niin atan season duhawm a nih chhoh ngei a rinawm.

Tennis tournament dang Dallas Open lamah Reilly Opelka chuan amah ang bawka American player Jenson Brooksby chu 7-6 (7-5), 7-6 (7-3) a hnehin a champion ve bawk.

Opelka hian final lut tur hian inkhel hautak a paltlang. Semifinal-ah John Isner nen match hautak an khel, tie break point 46 zet an khelh hnuah a chak zawkah a ṭang. Dallas Open a lak hian ATP title pathum a neih tlinna a ni nghal chiah.