Liverpool an chak hram

Premier League champion tum Liverpool-in Manchester City kal fal lutuk tur ngai ngam loin hnehna an chang ve zel a, Pathianni zan khan table mawngphah luahtu Burnley chu 1-0 in an hneh - Fabinho chuan inkhela goal awmchhun hi a khung.

Premier League inhamtan tum Burnley-in thih leh dam karah an awm tawh tih hriain, chak tum ngam chungin Jurgen Klopp leh a naute an lo mikhual a, an vanneih zan ni se Fabinho goal khung hmain hmahruaina hun ṭha an nei.

Burnley tan hian Josh Brownhill leh January-a an lakluh Wout Weghorst ten chance ṭha an nei a, mahse, an chhawr tlat lo. Reds tan tlarhmaah Mohamed Salah, Roberto Firmino leh Sadio Mane ten inkhel bul an ṭan ho leh ta a, mahse, Turf Moor-a ruah sur leh thli thaw nasa lutuk karah an duh angin an tal thei bik lo.

Liverpool tan minute 40-naah Fabinho chuan goal a khung hram. Trent Alexander-Arnold-a corner aṭanga ball kal chu Mane-a'n a lo tauh a, hei hi Fabinho chuan goal-ah a lo chantir - Brazilian midfielder-in inelna hrang hranga a match hnuhnung pasarihah goal nga a khungna chiah a ni.

Merseyside club tan Diogo Jota chuan hun tawp hnaih lamah Salah siamsak aṭangin chance duhawm nei mah se a chhawr thei lo a, 1-0 in Liverpool an chak.

Klopp chuan, "Engkim kha kan tana harsa turin a thleng emaw tih mai tur a ni. Thli a thawt nasat avangin boruaka ball a awm khan a kal dan tur pawh chhut thiam a harsa a, Burnley-in harsatna min siam ai mah chuan kan hun tawn kha a buaithlak zawkin ka hria," a ti!

German coach chuan sawi zawmin, "An chance neih tam zawk kha offside a ni a, mahse, an khelh ṭhat erawh sawi bo ka tum lo. Team quality tak an ni a, mahse, kan dang thei a ni. Kan hna kha a awlsam lo a, mahse, ka nauten an hna an thawk ṭha takzet. He hmuna inkhelh harsatzia ka hria a, kan chak avangin ka lawm a ni," a ti.

Liverpool-in point kuain hmahruaitu City an phak lo mek a, match khatin an khel tlem bawk. City an la hmachhawn dawn avangin champion beiseina an la nei - Nilaini zan dar 1:30-ah Inter Milan nen Champions League last 16 first leg an khel leh ang.

Hetihlai hian Burnley erawh table mawngphahah an awm chhunzawm a, a him china awm Newcastle United chu point sarihin an phak lo mek - match hnihin an khel tlem thung.