Inter Milan khelmualah champion beisei Liverpool

European football-ah team hmuhnawm ber pawl thlang dawn ila, Liverpool lam hmaih an harsa ang - Jurgen Klopp-a enkawl team hian inelna an hmachhawn paliah champion beiseina an la nei vek!

Inter Milan-in season ṭan dawnah Serie A champion puitu Antonio Conte chân mah se a thlaktu turin Simone Inzaghi an la fuh a, anni pawh inelna an telnaah champion an la beisei thei vek. Serie A-ah phei chuan hmahruaitu AC Milan an phak lohna hi match khata khel tlem chungin point khat chauh a ni.

Heti taka team ṭha pahnih hian zanin dar 1:30-ah Champions League last 16 first leg an khel dawn a, San Siro khelmualah Jurgen Klopp leh a naute an lenglut dawn - a hmuhnawm loh ring suh.

Liverpool midfielder Fabinho chuan, "Inter hi Italian team ṭha ber pawl an ni a, a harsa dawn tih kan hria," tiin a sawi a, Reds fan-ten awlsam taka chak turah an inngai a nih chuan an tisual ang.

Inter ṭhatna

Rei tak an tlakchhiat hnuah Conte-a'n harsa takin Inter team a din thar a, Italian coach a chhuah hnuah Inzaghi-a'n tlin takin Conte-a hnathawh ṭhat sa a chhunzawm a, an striker chhuanvawr Romelu Lukaku chu man to taka an hralh chungin harsatna an tawk lo.

Lukaku thlak tura an lakluh Edin Džeko hi kum 35 mi ni mah se a la chuai lo a, tun season inelna hrang hranga match 32 a khelh aṭanga goal 14 khungin assist vawi sarih a nei tawh. Chu chauh a ni lo - Manchester City striker hlui hian Liverpool a hmachhawn hnuhnung pathumah goal a khung vek a, Reds tlarhnung tan ven uluk a ṭul dawn.

Lautaro Martínez lam hmaih a thiang lo. Argentine forward hian match 31-ah goal 12 khungin assist vawi hnih a nei tawh a, chutihrual chuan Joaquin Correa leh Robin Gosens te hliam vangin an inlan theih a rinawm loh a, Nicolo Barella chu hrem vangin a inlan thei dawn lo bawk.

Inter hian tun season Champions League match ruk an khelhah vawi thum hnehna an chang a, group D-a pahnihna ni chungin last 16 hi an lut - an hnehte hi Shakhtar Donetsk leh Sheriff Tiraspol an ni a, Real nen an intawnah an tlawm ve ve thung. Liverpool-in hei hi an hre kar ang.

Liverpool hi...

AFCON vanga Mohamed Salah leh Sadio Mane an chân laiin Reds an talbuai dawn emaw an ti a, an player ṭha bik pahnih tel loh laiin tlawm an nei miah lo - tunah chuan player pahnih an lo kir leh tawh a, a harsa sawt ang.

Jurgen Klopp-a'n tlarhmaah duhthlan tur a ngah a, Salah leh Mane erawh lut chiang tura ngaih niin, Burnley laka bul ṭan Roberto Firmino aiah Diogo Jota a lut a nih chuan a mak lo ang - Brazilian forward hi player thar Luis Diaz nen bench-a ṭhu tura ngaih an ni.

Salah hian tun season-a match 28 a khelh aṭangin goal 23 leh assist pakua a nei tawh a, Jota hian match 31-ah goal 17 khungin assist vawi thum a nei a, Mane hian match 27-ah goal 10 leh assist vawi khat a nei a, Firmino pawhin match 23-ah goal sarih leh assist pali a nei - Inter tlarhnung tan fimkhur a ngai dawn.

Luis Díaz-a'n Liverpool a zawm hmain match 30-ah goal 16 leh assist paruk a nei a, ani pawh hi danglamna thlen thei player a ni. Midfield-ah Jordan Henderson leh Fabinho chu bul ṭan tur chianga ngaih an ni a, Thiago Alcantara, Naby Keita leh James Milner ten hmun ruak pakhat dang an

inchuh ang.

A hun tawh!

Liverpool-in kum 2019-ah Champions League nomawi an chawi a, a hma season-ah final an lut bawk. Mahse, European champion an nih hnuah last 16 leh quarterfinal-ah a zawnin an tla a, Atletico Madrid leh Real Madrid an ngam lo.

English club zinga European champion ni ngun ber Liverpool an insiamṭha hle - group stage match ruk an khelhah an chak vek a, goal 17 ngawt khungin an lamah goal ruk chiah a lut.

Liverpool hian Atletico Madrid, FC Porto leh Serie A lama Inter Milan elpui ber AC Milan te chu vawi hnih ṭheuh an hneh thei a, Italian club tan a awlsam lo ang tih a chiang.

Inter tlarhma tan si ban nghaktu Alisson paltlang a harsa dawn a, Brazilian keeper hmaah Trent Alexander-Arnold, Joel Matip, Virgil van Dijk leh Andrew Robertson te an din leh dawn bawk avangin Reds tlarhnung hi en mai chuan a him hle.