Inhliam vanga buai Bayern hmaah RB Salzburg

Zanin dar 1:30 hian Champions League last 16-ah Bayern Munich leh Red Bull Salzburg an inhmachhawn dawn. An inkhelhna tur hmun hi Salzburg khelmual Red Bull Arena a ni a, second leg hi March 8, Thawhlehni zan hian Allianz Arena-ah an khel leh ang.

Nikum kum tawpa fixtures pawh a nih khan Bavarians hi awlsam taka chak tura ngaih an ni a, amaherawhchu German champion hian kar tawp khan Bundesliga kai thar VfL Bochum lakah 4-2 in an tlawm - engmah a chiang ta lo.

Bayern chetchhiat chhan hi inhliam an ngah vangah a ngaih theih a, captain Manuel Neuer bakah Alphonso Davies, Leon Goretzka, Jamal Musiala leh Josip Stanisic te hliam leh damlohna vangin an chhawr thei lo. RB Salzburg erawh an dam kim thung.

Bavarians tho

Bayern Munich talbuai lai tak ni mah se record thlir kir chuan German champion tan hlauhthawnna tur awmin a lang lo. Season liam ta group stage-ah khan Bayern-in Salzburg hi khualmualah 6-2 in an hneh a, Allianz Arena-ah 3-1 in an hneh leh bawk.

Bavarians hian Austrian club lakah record an nei ṭha hrim hrim, kum 55 liam ta khan Cup Winners' Cup-ah Rapid Vienna 1-0 in an hneh lo a, hemi hnu hian tlawm an nei tawh lo.

Bayern hian Austrian club hi match kua an hmachhawn a, vawi sarih chakin vawi hnih an inhnehtawk. Europe inelna knockout china an inhmachhawn hnuhnung pathumah pawh Bayern hi a chak zawkah an ṭang vek.

Record a ṭha

Austrian club-ah chauh ni loin Champions League-ah Bavarians hian record an nei ṭha hrim hrim. Khualmualah match 21 chhung chak loh an nei tawh a, vawi 17 chakin vawi li an inhnehtawk.

Khualmuala Bayern chak loh hnuhnun ber chu September 17-a PSG laka an chak loh daih tawh kha a ni. Julian Nagelsmann hote hian 2019-20 season-a an club record an nih rual a, goal 22 khung tawhin goal thum chiah an la chhuah a, clean sheet vawi li an nei tawh bawk.

Mahse maw...

Bayern hian record nei ṭha viau mah se Salzburg hi zuam ngawt chi an ni lo. Europe inelna sang berin Champions League hming a put hnua Austrian club zinga knockout stage lut hmasa ber an ni a, an ram record siam belh zel an duh dawn.

Austria rama football inelna sang ber hi Germany ang thoin Bundesliga tih a ni a, Salzburg hi champion lai leh hmahruaitu an ni mek. Bayern Munich nen pawha sawi zawm Karim Adeyemi-a'n season ṭha tak a hmang a, kum 20 mi German forward hian tun season inelna hrang hrangah match 18 khel tawhin goal 14 a khung.

Salzburg hian tun hnaiah player ṭha an chher chhuak hnem a, chung zingah chuan Liverpool forward Sadio Mane leh Borussia Dortmund forward Erling Haaland te an tel. Adeyemi pawhin hmabak a nei êng hle. Chutihrualin Adeyemi ang thoa tun season Champions League-a goal thum khung tawh Noah Okafor hi Bayern tlarhnung tan ngaihthah a thiang lo ang.

Austrian club enkawltu Matthias Jaissle hi Bayern manager Nagelsmann (34 years, 210 days) ai mahin a naupang zawk. Jaissle hi kum 33 leh 318 mi a ni a, manager pahnih kum belhkhawm pawh kum 68 chauh a la ni.

A tawp nan Lewy

Bayern chanchin a nih tawh chuan Robert Lewandowski hming lamrik ngei a ṭul a, Polish striker hian tun season UCL-ah goal 11 a khung tawh a, Ajax striker Sebastien Haller (12) chiah a tluk lo.

Lewy hian season liam ta khan inelna hrang hrangah goal 48 a khung a, tun season-ah goal 37 a khung tawh avangin 2019–20 season ang thoin goal 50 chuang a khung leh mai a

rinawm.

Bayern-in Lewandowski an neih avangin tlarhma a ngaihtuahawm lo a, tlarhnung erawh tun hnaiah a pawp hle. Mimal mawhpuh theih ni bawk mah se mawhphurtu tak chu manager a ni a, Nagelsmann-a'n a tihphui dan a zawn a ṭul ang.