Novak Djokovic a insawifiah A hma hun a fiah chuang lo

Tennis world number 1 Novak Djokovic chuan Covid-19 vaccine a lak loh vanga buaina chu pawi a ti a, chutihrualin Grand Slam khelh leh zel turah invenna lak ngei a ngai a nih pawhin a la dawn em, tih a la sawi chiang thei chuang lo.

Serbian star hi vaccine la duh lo intelkhawm zingah a tel hran lo, amaherawhchu ani chuan mimal zalenna leh duhthlanna a ngai pawimawh thung - tih luihna hmanga invenna lak chu a duhzawng a la ni thei lo a ni.

Kum 34 mi Djokovic chuan, "Vaccine dodaltu ka ni hran lo. Mahse, mahni taksaa damdawi thun tur chungchangah chuan zalenna neih a pawimawh ka ti, mahni duhthlanna ni rawh se," tiin a ngaihdan a la danglam lo.

A chiang lo

Australian Open khelh tum mah se Djokovic hi thawn haw a ni. Grand Slam khelh hmabak French Open leh Wimbledon-ah pawh a inlan thei ngei dawn em, tih a la chiang chuang lo, ram pahnih France leh UK ten inkaihhruaina an siam danin a la hril ang.

Zawhna chhangin Novak chuan, "Ka lakah harsatna hrang hrang a thleng thei, hemi hresa chunga thutlukna siam ka ni," tiin major tournament a hmachhawn theih lo chu amah thutlukna a nih thu a sawi.

A duhthusamah chuan inelna lian a tam thei ang ber khelh a duh. Mahse, hripui len lai a nih miau avangin mahni duh leh beisei ang ngawtin a awm theih loh, tennis player pawhin an zinna tur ram inkaihhruaina an zawm a ngai zel.

A pawi lo?

Grand Slam champion hnem lamah Roger Federer, Rafael Nadal leh Djokovic te an intluk ṭhin, nomawi 20 vek an nei. Australian Open-ah Nadal a champion tak avangin record thar a siam, a chungnung ber a ni mek.

Djokovic chuan, "Ka taksa hi uluk thei ang bera enkawl zel ka duh, hriselna hi ka tan chuan thil dang zawng aia pawimawh zawk a ni. Hrisel lo tan rei tak inkhelh theih a ni lo, chuvangin hrisel taka awm a pawimawh," a ti.

Tun hma aṭangin Djokovic hian hriselna a ngai pawimawh. Exercise bakah ei leh in thlengin a in uluk a, kum 30 chuang a nih hnuah pawh a pian phung a la dikin a hrisel ṭha hle - a elpui Nadal leh Federer aia inkhelh rei ngei chu a tum.

Novak thlirna

Mi tam takin vaccine a lak loh avangin Djokovic an sawisel a, chutih laiin Australia sorkar chet dan sawiseltu an awm bawk. Ngaihdan a inang thei lo a, thlirna chi hnih a awm thei, thuneitu zawk erawh an awm tih hriat a ngai.

Djokovic chuan, "Mi tam takin invenna damdawi an la chur chur a, an duhthlanna a nih avangin sawisel theih a ni chuang lo. Chutihrualin vaccine lak leh lak loh ai chuan vanduai leh vanneih danah a innghat zawk ni maiah ka ngai," tiin a sawi.

Nikum khan Novak hian ṭum hnih hri leng a kai a, natna lang chhuak leh harsatna a nei hran lo. Vaccine chungchanga a ngaihdan hi a thlak mai dawn lo niin a lang a, season kal laiah harsatna dang a tawk leh a nih pawhin a mak lo ang.