Vanglaini Biangbiakna

Mizo football legend Lalrindika Ralte chuan February 12 khan inkhelh a chawlhsan thu a puang a, Mizoram football mai ni lo, Indian football thlengin a nghawr nghing a, tam takin, "Ta se..." tia duhthusam chungin an thlah liam a, ṭhenkhatin a la hma hreta an hriat thu an sawi a, Indian football chuan a 'fapa rangkachak' ni tura a lo beisei ṭhin a thlah meuh chuan a lunglenna a thup zo lo.

"Vawiina ka nihna min petu football chu ka thlah a lo ṭul ta," a ti a, lawm tak chunga, "Ni e," lo tihpui chu thil harsa a ni. "Didik, i liam ang maw?" tiin phal lo chungin kan zawt a, mahse, Lunglei tlangval hian a rilru sawhsawn a tum lo.

A inkhelh thiam vanga Kolkata khawpui meuh nghawrnghing a, German club meuh chil lo tiput tawhtu hian tawk a ti tawh a, duhkhawp lohna khawvelah hian a thlen chinah lungawi a zir a, a hmangaih football leh khelmual chu a mangṭha ta.

Vanglaini chuan Mizo min lo tihmingṭha tawhtu hi phek kilkhat leka thlah atan chuan uiawm a ti a, Lunglei tlangval lunglenna chu titi puiin, sulhnu tam tak a lo hnutchhiah tawh chu kan chhui kirpui a nih hi.

A bul ṭanna

Kum 2004 khan football tournament lar tak pakhat GAIL MZP Cup chu khelh a ni. Chu tournament-ah chuan Lunglei aṭangin Mizo legend la ni mai tur naupang pakhat a rawn tel ve a, an match khelh zawng zawngah an la chak lo zui!

Mahse, he inelnaah hian IFA Academy aṭangin scout an lo kal a, a tla hma ho tana trial an buatsaihah Didika a tling hlauh - Kolkata lama hruai thlak zingah a tel zui a, an trial leh a, GAIL MZP Cup-a chak lo vek team player zinga mi hi an thlang tlat.

IFA Academy hi a tirah chuan mumal taka kalpui a ni a, Didika leh a ṭhiante pawhin nuam an ti hle. Mahse, West Bengal FA-in sum lamah harsatna an tawk zui a, coach an thlak sek a, IFA hnuaia footballer nih beiseite beiseina chu zawi muangin a thamral ṭan.

Kum 2008 a her chhuak a, kalphung pangngai taka kal ni se, club sawmna lehkha nen Didika te chu 'graduate' tur an ni - mahse, IFA mumal loh an tuar a, an coach Sujit Chakraborty-a'n ONGC a pansan a, local coach enkawlna hnuaiah an chhuak ve hram a, sawmtu club nei loin an chhuak.

Rs.6000 hlawh turin!

Club nei loa awm Didika te rilru a buai a, an coach hlui Sujit chu club ngaihtuahsak turin an ngen a, anin Kolkata club George Telegraph a lo biaksak - a Mizo ṭhiante Lalchhuanawma, Beikhokhei Beingaichho leh Beirona te nen an pan.

Mizo player dang pathum hi thla khata Rs.8,000 hlawh turin tih an ni a, an zinga naupang ber Didika chu thla khata Rs.6,000 hlawh turin an be thung. Lunglei rawlthar lunglian Didika'n hlawh tlem bik a duh lo a, an sawmna a hnar.

Beidawng takin Didika'n a puanthuah nen Mizoram a pan a, rei tak academy-a awm hnua club nei loa haw chu hrehawm a ti hle. Didika chuan, "Coach Sujit-a hnenah TFA-a min sawipui turin ka ngen a, mahse, buaina a awm avangin min la lo.

"Ka beidawng takzet. Kohhran hoten min ṭawngṭaipui reng a, chhungten kan chungah beiseina an nei sang a, club nei loa haw chu zahthlak tak a ni," tiin a hun tawn thim chu a thlirkir.

Hmana an duh loh kha

Mizoramah thla hnih zet club nei loin Didika a awm a, professional football a lo mangphan ve zawng zawngte chu a thamral mek. Mahse, India Under-19 an lo lang a, AFC U19 Asian Cup qualifier khel turin Lunglei rawlthar chu koh a ni.

India U19 camp-ah Didika hian thla li zet hun a hmang a, Asian Cup khel phak ta lo mah se a hma lawka Rs.6000 hlawh tura an dawr midfielder kawngkharah Indian club lian an intlar a, TFA pawhin an academy-a awm turin an sawm.

Didika chuan, "Min dawrtu club 10 an awm a, East Bengal leh Mohun Bagan-in hlawh min pe huai ngam ber. Naupang mai ka nih avangin rilru siam thiam a har hle a, Robert Lalthlamuana ka be zui.

"Ani hian, 'Sum ngaihtuah rih suh. Kolkata club-ah chuan player naupang tan chance a tlem a, kum thum vel i inkhelh loh chuan i thamral mai ang,' min ti a, Robert-a vangin Churchill kha ka zawm a ni," a ti a, hetihlai hian I League-ah club 12 an awm.

Ropuina ramah

Didika'n thutlukna a siamsual lo. Churchill Brothers tan a hming a chher zui a, kum 2012 a herchhuah meuh chuan East Bengal meuh pawh ngaihngam takin a zawm ve ta a, Kolkata club-ah hian a vanglai hun a hmang.

November 2013-a Kolkata derby, entu mipui 80,000 hmaa penalty box pawn aṭanga a goal khungte kha aw - tun thlengin Kolkata derby goal ropui sawi apiangin sawi tel a ni a, East Bengal fan-te chuan an theihnghilh thei lo.

East Bengal-a hun duhawm a tawn chhoh lai hian Didika hian India national team-ah pawh hmun a chang chho a, Bundesliga kai thar hlim club Fortuna Düsseldorf chuan an club-a trial nei turin Mizo midfielder hi an sawm.

Didika chuan, "A hunlai khan han rawn mai tur, heti lama experience nei tawh an awm mang lo a, thutlukna siam kha ka thiam lo. Trial neiin awm bo ila, India senior team-a ka hmun thlenga chân ka hlau si a, ka kal ta lo. Tun hnu hian lo huaisen deuh ila, tiin ka ngaihtuah fo ṭhin a, ka career-a ka inchhirna ber a ni," a ti.

A pawi zo ta

Didika hi East Bengal tana a khelh laiin Mumbai City chuan ISL-a player man to ber pawl ni turin an chhang a, loan-in a khel. ISL season hmasa berah ṭha taka a khelh hnuain East Bengal-ah a kir a, a inhliam ta - hemi hnu hian ngai a awh leh tawh lo.

Lunglei tlangval chuan, "Ka ke artuiah hliam ka nei a, season khat tawp ka inkhel lo. Kei chuan ngai awh leh mai turah ka inngai a, mahse, a lo ni lo. Danglamna em em awm loa ka inhriat lai khan, video-in ka inkhel ka thlirlet a, ka inhliam hma kha ka pha ta lo hle tih ka inhmu chhuak a ni," a ti.

Heti chung hian Didika duhtu an tlem phah lo. ATK chu ISL-ah a champion pui a, NorthEast United neitu, Bollywood star lar John Abraham chuan a club tana khel tura a duh em avangin chhun chaw eipuiah a sawm hial!

Highlander tan season khat a khel a, East Bengal-ah kirin captain hial a ni leh a, Real Kashmir aṭanga inkhelh a chawlhsan dawn thlengin sawmtu a la nei nual - mahse, Mizo tlangvalin a tawk a ti tawh a, a boot a khai ta.

Sulhnu leh lunglen

Didika chuan, "Inhliam lo ila, hei aia sang hi ka thleng ang em aw, tiin ka ngaihtuah ve fo mai. Mahse, ka thlen chinah ringawt pawh ka lawm a, Mizo mipuiten min thlawp reng a, ṭawngṭaipuina pawh ka dawng hnem em em a ni," a ti.

India tana SAFF Championship nomawi a chawi ngaihlu bertu chuan, "Boruak a san poh leh inkhelh nuam ka ti ṭhin a, footballer tam takin an huphurh lai khan Kolkata derby kha nuam ka ti ṭhin.

"Chuvang chu a ni mai thei -Kolkata derby-ah hian goal ka khung loh chuan assist ka nei ziah a, man of the match-ah vawi thum thlan ka ni bawk," a ti a, Salt Lake Stadium-a mipui khat tlat hmaa inkhelh chu nuam a ti ber.

India tana vawi 16 inlan Didika hian a career chhungin Durand Cup (1), Federation Cup (1), Calcutta Football League (5), IFA Shield (1), Indian Super League leh SAFF Championship-ah te champion nomawi a chawi.