Mizoramin training an ṭan

Ranji Trophy khel tur Mizoram cricket team chuan nimin khan training an ṭan a, February 16 hian match hmasa berah Bihar an hmachhawn dawn.

Mizoram hian February 10, Ningani khan inelna neihna tur Kolkata an thleng a, five star hotel Taj Bengal-ah an thleng. Covid-19 inkaihhruaina vangin ni nga chhung an inkhung a, squad-ah hian player 20 leh coaching staff panga awmin Covid-19 test-ah an negative vek.

Ranji Trophy hi group stage-ah ni li chhung khelh a ni a, a kalphung chu Test cricket nen a inang. India ram state leh state inelnaa ngaihhlut ber a ni.

Tun ṭum inelna hi hmun hrang hrangah neih a ni a, Mizoram awmna Plate Group hi Kolkata-ah an khel dawn. Plate Group-ah hian Mizoram bakah Arunachal Pradesh Bihar, Manipur, Nagaland leh Sikkim te an awm.

Chutihrualin team zawng zawng hi an inkhel vek dawn lo. Team tin hian match thum ṭheuh an khel dawn a, Mizoram hian Bihar bakah Manipur leh Nagaland te an inkhel ang.