FIFA-in Argentina player pali an hrem

Football thuneitu sang ber FIFA chuan Argentina player pali chungah hremna a lekkawh. An hrem chhan hi Brazil leh Argentina inkhelh dawnah Covid-19 inkaihhruaina an zawm ṭhat loh vang a ni.

Nikum September 5 khan South American ram pahnih te hian Rio khawpuiah World Cup qualifier an khel. Inkhel ṭan aṭanga minute ngana lekah Brazil rama damdawi lam thuneitute vangin inkhel hi an ti tawp.

Brazil sorkarin hripui leng lakah inkaihhruaina a siamah chuan an rama inkhel tur chuan inkhunghran hun tur bituk an nei. Mahse, Argentina player pali - Emiliano Buendia, Emiliano Martinez, Cristian Romero leh Giovani Lo Celso te chuan dan hi an zawm lo.

FIFA chuan player palite hi match hnih khel thei lo turin a hrem. World champion vawi hnih ni tawh Argentina hian World Cup qualifier khelh hmabak pahnih la nei mah se an tling chiang tawh a, an tan thil pawi tak a ni hran lo ang.

Ram pahnih Football Associations te hi FIFA chuan £40,000 a chawitir ve ve bawk, pawisa an chawi chhan hi match khelh tura tih tawh sa an khelh loh vang a ni.