Puitea'n Kerala Blasters a chakpui
Indian Super League-ah Mizo hming a mawi leh ta - Thawhṭanni zan khan Kerala Blasters chuan 1-0 in East Bengal an hneh a, Mizo tlangval K. Lalṭhathanga chu hero of the match atan thlan a ni.
Blasters goal awmchhun hi Enes Sipovic chuan minute 49-naah a khung a, Kolkata club-in a chhanletna tur an neih loh avangin Blasters an chak a, semifinal khel turin an dinhmun a ṭha leh ta sawt.
South Indian club-in hnehna an chan avangin table-ah pathumna an ni a, hmahruaitu Hyderabad an phak lohna chu point thum chauh a ni a, match khatin an khel tlem zawk bawk.
A hming Puitea
Inkhela goal awmchhun hi Puitea ke aṭanga chhuak a ni a, second half ṭan aṭanga minute lina lekah Bethlehem Vengthlang tlangval hian corner a pet a, Bosnian centre back chuan inkhela goal awmchhun ni turin a lo tauh lut.
Puitea hian tun season ISL-ah match 13 khelin assist vawi hnih a nei a, league match 15 an khelhah vawi hnih chiah a inlan lo tihna a ni. Vawi 448 pass neiin a passing accuracy hi 78.79% a tling a, vawi 69 ngawt tackle a nei.
Mizo midfielder chuan, "Zep thu a awm lo. Season ṭantir kha chuan heti zat match khelh hi ka inring lo. Mahse, theihtawp ka chhuah reng a, phak ang tawka Pathian ka koh ve rengnate malsawmin a awm ni berin ka hria," tiin Vanglaini
a hrilh.
Match 52
DSK Shivajians aṭanga professional career ṭantu Puitea hian 2017 khan NorthEast United a zawm a, mahse, Aizawl FC lamah loan-in an kaltir zui. 2018-19 season khan a ISL season hmasa ber a hmang a, match 20 khelin semifinal an luh theih nan player pawimawh a ni.
Mahse, 2019-20 season-ah Puitea hi hliamin a tlakbuak zui a, Highlander tan match kua chiah a khel - season hmasa khan match 20 an khelhah match 10 a inlan a, tun season-ah erawh midfield-a an innghahna ber a ni ta.
ISL-ah season li chiah a la khel chungin Puitea hian match 52 a khel tling ta der a, goal khat khungin assist vawi li a nei a, 72.72% passing accuracy neiin, vawi 129 tackle a nei.
Puitea beiseina
Blasters-in match nga khelh tur an la nei a, an elpui ATK Mohun Bagan, Hyderabad FC leh Mumbai City te chu an hmachhawn tur zingah an la tel - an hmabak match ngaah an chak vek chuan hmahruaitu ni chungin league round an khar thei dawn tihna a ni.
Puitea chuan, "Kan hmabak kan hria a, semifinal khelh mai ni lo, league hmahruaitu ni ngei chunga league round khar kan duh - kan kutah engkim a awm a ni," tiin Vanglaini a hrilh a, AFC Champions League khelh an duh.
Bethlehem Vengthlang tlang-val chuan, "Keimah lamah pawh ka ṭang nasa a, hmasawn zel tumin theihtawp ka chhuah. Ka ei leh in thlengin ka tidanglam a, rim takin ka thawk a ni," a ti a, a thawhrim rah hmutute kan ni e.