Maguire thlak a ngaihna ka hre lo - Rangnick, Man United manager lailawk

Manchester United manager lailawk Ralf Rangnick chu a captain chungchang an zawt a, tuna a captain ni lai Harry Maguire chu tlak a ngaihna a hriat loh thu a sawi. Maguire-a'n captain armband a hreng chhunzawm dawn.

England international hi Premier League season kal laiah a che ṭha tawk lo, an match hnuhnung pahniha Burnley leh Southampton an hmachhawn ṭumin chetsual a nei bawk. Khawthlang media ṭhenkhat chuan Man United-in captain an thlak dawn nia tarlang an awm leh hman.

Rangnick chuan, "Match hnuhnung pahnihah tihsual lian chu a nei ngei mai. Sout-hampton lakah a che ṭha lo, Burnley lakah goal kan chhuah chhan niin a lang bawk. Mahse, kan captain a ni a, tun dinhmunah thlak a ngaihna ka hre lo.

"Hmasawn zel duh mi a ni a, tun hmain a theihna sang tak lo lantir ṭhin tawh mah se tun hnaia kan game khelh dan erawh a danglam deuh, chuvangin player dang awng bawkin insiamrem ngaihna lai a nei," a ti.

Kum 28 mi Maguire hian 2019 khan Leicester City aṭangin Man United hi a pan, thla ruk hnu lekah captain atan ruat a ni. United tan hian inelna hrang hrangah match 132 khelin goal ruk a khung tawh a, nomawi chawi erawh a la nei lo.