Trippier inhliamin Newcastle-ah nghawng a nei dawn em?

Newcastle United defender Kieran Trippier-a'n a ke phahah hliam a tuar a, a chawl rei dawn. England defender hian Pathianni zan khan Aston Villa lakah goal awmchhun a khung a, minute 48-naah hliam vangin an thlak.

Kum 31 mi Trippier hian January transfer khan Atletico Madrid aṭangin pound maktaduai 12-in Newcastle United a zawm a, match li khel tawhin goal hnih a khung.

Magpies hian match hnuhnung paliah tlawm an la nei lo a, match hnuhnung pathumah an chak vek. Hei hian Trippier-a ṭangkaizia a sawifiah a, defender ni chungin goal hnih a khung thei a, khelmualah team kaihruaitu pawimawh a ni bawk.

Trippier inhliam leh a nghawng

Newcastle defender Trippier chuan, "Ka inhliam hi pawi ka ti takzet. Team kan ti nung thar a, hun rei tak a daih ka beisei. A êng zawngin ka thlir a, rim takin ka thawk chhunzawm ang. Min thlawpna avangin ka lawm takzet," tiin twitter-ah a ziak.

Trippier hi a ke vei lam an rahsak avangin a ke phah ruh a khi a, match nga vel an khel thei lo tura ngaih a ni. Newcastle hian West Ham, Brentford, Brighton & Hove, Chelsea leh Crystal Palace an hmachhawn hunah Trippier hi a inlan theih a rinawm loh.

Newcastle manager Eddie Howe chuan, "Trippier awm lo tur hi chânna lian tak a ni," tiin a sawi ve bawk. Magpies tan Trippier inhliam nghawng a len chhan chu a thlak thei tur ber Javier Manquillo pawh a ke hliam vang thoin Villa nen an inkhelh ṭum hian first half-ah an thlak.

Match hnuhnung bera Trippier thlaktu Emil Krafth hi Sweden tan pawh vawi 38 lai khel tawh ni mah se Premier League-ah beisei a pha lo - tun season-ah pawh vawi sarih chauh a la inlan. Chutihrualin full back-ah hian winger Jacob Murphy a chhawr theih a, amaherawhchu Krafth aiin a ṭha bik kher ang em, tih erawh zawhna a awm thung.

Aston Villa lakah loan hmanga an hawh Matt Targett an chhawr thei lo a, kartawpa West Ham an hmachhawn hunah erawh left back Targett a awm tawh dawn. Manquillo a dam hman a nih bawk chuan Newcastle tan Trippier awm loh vanga tawrhna a ziaawm ang.

Magpies an him?

Newcastle United a zawnin match thum an chak zawn a, relegation zone an chhuahsan. Magpies hian an hnuai chiaha awm Norwich aia match khata an khel tlem chungin point liin an hmu tam zawk.

Eddie Howe te hian thlasik bazarah pound maktaduai 90 zet an sen bawk avangin an squad a chhah sawt a, Premier League an inham tan mai a rinawm ta hle. Chutihrualin Premier League-a him turin point 40 hmuh a ngai an ti ṭhin a, Magpies hian tuna an point hmuh let deuh thaw hi an la hmuh a ngai.

Trippier tel loin tunkar tawpah West Ham United an hmachhawn dawn a, Brentford leh Brighton zawhah Club World Cup champion Chelsea an hmachhawn lehnghal dawn bawk avangin Eddie Howe te tan match tina point hmuh a harsa ang.