Intlansiak tlem kan duh - Franz Tost

Formula 1 team AlphaTauri team boss Franz Tost chuan intlansiak tam lutuk chuan harsatna a thlen thu a sawi a, thuneitu lamin ruahmanna siam tawh mah se a theih chuan inelna tih tlem deuh ni se an duh thu a sawi.

Car intlansiakna sang berah hian season hmasa khan intlansiak 22 a awm, kuminah hian vawi 23 awm turin ruahmanna an siam. Hripui len lai a nih avangin ruahman lawk angin thil a thleng thei dawn em, tih hriat a la ni lo.

F1 thuneitu Liberty Media chuan intlansiak hi a tam thei ang ber neih an duh thung a, kum 2017-a thuneihna an neih aṭang khan intlansiak a tam thei ang ber neih tumin hma an la - an duhthusamah chuan inelna 25 thleng awm se an duh.

Tost chuan, "Ka duhthusamah chuan intlansiak hi vawi 18 aṭanga 20 inkar vel ni se ka duh. A chhan chu Formula 1 a nih tawh chuan engkim khawvela a ṭha ber a ni tur a ni, a tam hret avanga tih mai mai a awm tur a ni lo.

"A nihna takah chuan kumina intlansiak 23 a awm tur hi a lawmawm. Chutih rualin a sir lehlam kan chhut tel a ngai ve bawk, team zawng zawng hian inelna tam zawk hi kan tlin em tih chhut uluk a ngai, ka duh danah chuan tlem hret se a ṭhat zawk ka ring," a ti.