Yamaha hi ka duhthusam - Quartararo

MotoGP world champion Fabio Quartararo chuan season thar a thlir a, a team Monster Energy Yamaha nen ngei mai hlawhtlinna an chan leh theih ngei a beisei thu a sawi.

Bike intlansiakna sang berah hian kum 22 mi Quartararo-a'n vawi nga hnehna changin nomawi a chawi a, amah elphak an awm lo. Season tharah pawh a chesual viau a nih loh chuan rinkai a ni leh dawn.

French tlangval Quartararo chuan, "Mitin hian duhzawng leh hman thiam kan nei vek, ka tan chuan Yamaha aia ṭha leh rintlak an awm chuang lo. Team ka zawm ṭan ni aṭanga tun thlengin a ṭha lam zel a la ni rih.

"Hun rei tak chhung ka chenchilh ve tawh a, kan inhre chiangin kei ngei pawhin bike hi ka hre bel viau. Chuvangin season thar atan pawh inbuatsaihna kawngah harsatna a awm ka ring lo," tiin a inringtawk hle.

MotoGP season tharah hian intlansiak 21 awm tura ruahman a ni. Inelna hmasa ber atan chuan March 6 hian Grand Prix of Qatar an tlan ang; thla leh hian inelna pahnih a awm tawh dawn.